Raymond Knops rabia cu Gobierno; “Papia cu nos en bes di papia di nos den publico”

5144

“Despues di mi conferencia di prensa digital di ayera merdia, a sali den medionan cu Aruba ta bay fia pisa riba mercado di capital local, esta maximo 400 miyon florin. Mi ta haya esey hopi remarcabel, pasobra e prestamo – cu duracion di 7 aña – ta bay acompaña cu un porcentahe di interes fiho di 5,3%, mientras cu tanten no ta paga nada bek di e prestamo mes.” Esaki ta aparece den un declaracion ricibi for di Secretario di Estado Raymond Knops, di Asuntonan di Reino, riba e intencion di Gobierno di Aruba pa haci prestamo.

E ariba menciona, segun Knops, ta nifica cu Aruba ta pone un carga di 21 miyon florin na interes anual riba lomba di su poblacion, “algo cu absolutamente mi no ta compronde. Pasobra con bo ta splica ciudadanonan di Aruba cu den e tempo di coronacrisis aki cada ciudadano, pa e proximo 7 añanan, ta perde casi 1400 florin cada un.”

Banda di esey e debe di estado ta aumenta te na mas cu AWG 5 biyon of un cuota di debe di BBP di 127% . “Ademas mi ta puntra mi mes e ora ey: como pais bo kier ta entre e top dies paisnan cu debe estatal mas halto? Bo kier compromete e futuro generacion di e forma aki cu e problema? Anteriormente mi a lesa cu Prome Minister Wever-Croes a indica cu, no obstante tur dificultad na Aruba y den mundo, mester keda mantene confiansa cu Aruba lo sali mas fuerte for di e crisis aki. Mi ta di opinion cu esaki no ta e manera corecto pa sali mas fuerte for di e crisis aki. Aruba lo a haci miho si nan lo a papia cu  nos en bes di papia tocante di nos den publico.”