Tabata alrededor di 10:20 pm ora cu polis a duna un auto marca Toyota modelo Agya color blanco numera A-24597 señal pa para den e area di Sero Teishi pero e no a para. A start un persecucion cu a termina te na Ser’i Janchi na Noord. A subi Adriaan Lacle Boulevard, sigui pa Van Leeuwenhoekstraak, RCA, rotonde Tanki Leendert, Catiri y termina na Sero Janchi.
E persecucion no tabata uno facil, a activa por lo menos dies patruya di polis. A hasta paga luz pa purba core pa polis, pero e helicopter tabata siguie na tur momento. Den e proceso di core pa polis el a dal contra di dos auto, un auto particular y un patruya di polis. A detene dos persona, no solamente e chauffeur pero tambe su pasahero.
Ambos ta relativamente hoben. A transporta nan pa warda di polis p’asina presenta nan dilanti un subfiscal. Na final a takel e auto y confisc’e pa djey hib’e pa warda di Balashi. Na final por conclui cu un auto cu motor chikito a logra core y activa basta polis.
