Randolf Lacle un rato pasa a gana eleccion pa presidente di Arubaanse Voetbal Bond. Di e 50 votonan disponibel, entre e 25 clubnan cu tin dos voto cada un, un total di 29 voto a bay pa Randolf Lacle mientras cu 16 a bay pa Richard Dijkhof. Despues di 8 aña di sosten y confiansa, e clubnan a expresa awe nochi cu nan ta desea un cambio den direccion di e federacion di futbol di Aruba.
Otro miembronan cu a postula nan mes pa e puesto di presidente ta Jairzinho Tromp cu a haya solamente 1 voto. Jeff Lopez a haya sosten di solamente 4 voto mientras cu Kurt Thomas, cu ta den e bestuur awo y cu a postula su mes cuater aña pasa caba como presidente awe a conta cu 0 voto.
Dos miembro nobo cu a drenta directiva awo ta Howard Hart y Geetanjali Khemlani. Exito na Randolf Lacle y na e miembronan nobo.
