Den un evento teni recientemente e artista local Randall Luidens, antes conoci como Zyon, a lansa oficialmente pa su fanaticonan e cancion “Pegate”.
Por corda e artista aki ainda, kende a move basta durante temporada di carnaval cu diferente composicion. Despues a keda manera un silencio meymey di aña y awo e ta bek duro duro, trahando na mesun momento riba un album cu ta den aire despues di e temporada di carnaval.
Mientrastanto cu e album ta kedando cla, e artistanan ta concentra riba cancion pa e mercado Hulandes, cu ta uno basta bon. Ainda por corda su ultimo produccion cu tabata yama “gaña, gaña” y dos otro mas, cu tambe a cay na agrado di e genero. “Pero “Pegate” ta e single cu mi ta bay pusha hopi riba dje y mi ta hopi entusiasma cu esaki,” e artista a conta nos.
E artista no por bisa con su inspiracionnan ta bin. Pero loke si e por conta cu pa e ultimo cancionnan el a traha cu un productor Hulandes, cu ta traha cu varios artista grandi di Hulanda. E productor a scuch’e y a entregue un track cu e peticion pa mira kico e por haci cun’e. Luidens a zona hopi entusiasma con e produccion aki a bay pasobra den un ora di tempo e tabatin cla. “Esaki ta e mi canticanan, esunnan cu ta yega cerca bo y no mester bay busca,” el a splica.
Concepto tras di clip
E concepto di e clip ta mesun cos cu e cantica, cu e ta un persona cu no por papia Spaño y ta purba di papia cu un mucha muhe ta papia Spaño al estilo Hulandes. Pues casi nan no ta compronde otro.
Na Hulanda
Randall Luidens kier promove su mas reciente produccion riba e mercado local, apesar cu e tin su toke Hulandes. El a recorda cu Arubianonanta hendenan hopi orguyoso cu gusta scucha nan cancionnan na Papiamento. Musica na Hulandes por ta un cambio un tiki incomodo, pero no mester preocupa pasobra lo sigui haci cancionnan na Papiamento.
E ta pidi radio-emisoranan duna nan apoyo na e cancion aki, cu di e forma ey su popularidad lo yega na e mercado Hulandes tambe.
Mas proyecto
Tin hopi cos den tapara, pero den area di Calypso e lo no bay competi mas, pero si lo tin algo pa temporada di carnaval. “Nan no ta traha ainda, pero lo tin algun cancion extra den carnaval. Mi no sa kico exactamente, mirando cu mi no ta traha nan ainda. Pero algo mester pasa den carnaval si. Despues di carnaval ta bin e album y despues di esey, ken sa.”
Invitacion
Randall ta spera cu tur hende share e video, tur hende wak e video. E ta riba Youtube y tambe tur streaming platforms.
