Randal Corsen & Orchestra a kaba di finalisá un produkshon nobo. Na un konferensia di prensa ayeranochi na restorant The Trader den World Trade Center pa promé biaha por a skucha e tumba nobo ‘Henter Aña den Paranda’ ku kanto di Dibo D(oran), Rich Pieter i Yumarya Grijt.

Esei ta konforme tradishon di fin di aña, pa e piesa aki awor por keda zona
durante henter aña. Esaki sigur lo ta un di e piesanan ku e banda lo presentá dianan 28 i 29 di
desèmber awor den e konsiertonan ku gradualmente a bira un tradishon bou di e lema  ‘Paranda di Fin di Aña’ na Landhuis Brakkeput Mei Mei. Pianista i lider di orkesta Randal Corsen a konta ku kantante Yumarya Grijt a aserk’é ku un melodia i teksto pa ‘Henter Aña den Paranda’. E idea pa e piesa a bini di Yumarya ku a biba 23 aña na Hulanda, pero kada be ku e tabata na Kòrsou tabatin motibu pa un paranda, sin importá e temporada di aña. Randal a sigui traha riba dje i a traha e areglo pa grabashon ku su orkesta i e tres kantantenan fiho Dibo D, Yumarya Grijt i Rich Pieter. E músikonan ta Eric Calmes (baho), Rhazul Sebelon (kuarta), Pernell Saturnino (perkushon), Ernie Gregorius (timbal), Marlon Conradus (drùms), Randal Corsen (piano) i un sekshon di supladó bou di guia di Igort Rivas (tròmpèt). E grabashon, mixing i mastering di e piesa tabata den bon man serka Oscar Bor, semper envolví den presentashonnan di Randal Corsen & Orchestra, i pa e grabashon aki huntu ku Randal Corsen tambe e produktor. ‘Henter Aña den Paranda’ pa pianista, kompositor, areglista i lider di banda Randal Corsen ta e promé produkshon original ku el a graba aki na Kòrsou mes.

Muy pronto ta sali tambe un videoclip di e piesa aki bou di direkshon di QD Navarro di Area 51. Paranda di Fin di Aña A hasi uso di e oportunidat pa anunsiá ku djaweps 28 i djabièrnè 29 di desèmber lo tin na Landhuis Brakkeput Mei Mei pa di kuater aña konsekutivo e siklo di konsierto ‘Paranda di Fin di Aña’ di Randal Corsen & Orchestra ku e solistanan Rich Pieter, Yumarya Grijt i Dibo D. E patrosinadornan ta Bacardia i Dewar’s White Label. Por spera aki un selekshon variá di músika popular ku tradishonalmente ta
interpretá den e dianan di fiesta di fin di aña i di presentashonnan anteriormente dje aña aki. Asina Randal Corsen & Orchestra semper ta duna esaki un dimenshon adishonal. Mas ku klaro ku e produkshon propio nobo ‘Henter Aña den Paranda’ durante e konsiertonan no por faya – no solamente pasobra ya esei lo a kue merkado, pero tambe pasobra e ta kuadra presis den e konsepto di konsiertonan den fin di aña. Benta di karchi na rason di 75 florin pa persona ya a kuminsá. Fun Miles a mara un akshon spesial na esaki. Por kumpra serka nan karchi na rason di 40 florin mas 500 Fun Miles, tanten tin (òp=òp).

Comments

comments