Randal Corsen Orchestra ta lansa “Mi Bon Amigu”

Despues di un temporada relativo di silensio, Randal Corsen Orchestra (RCO) ta bèk ku un produkshon nobo riba merkado titulá ‘Mi Bon Amigu’. Ta trata di un piesa den e género di timba (salsa moderno, estilo Cubano) kantá na papiamentu pa Yumarya Grijt.

Salsa ta un género ku ta forma parti di nos kultura di músika pa añanan largu kaba, pero timba na Papiamentu si ta algu nobo ku RCO ta introdusí den farándula lokal. E tema di e
piesa ta alegre ku un mensahe positivo. Parti di e letra ta bisa: “Mi tin un bon amigu, ku tin
un problema. E strès ku ta domin’é ta kita tur atenshon di tur e kosnan bon ku ta rondon’é.”

Mas aleu Yumarya ta kanta ku e tin e remedi pa solushoná e bon amigu su problema:
“Kanta, kanta tur dia, alegra bo bida ku bon energia”. Pa loke ta trata e komposishon ‘Mi Bon Amigu’ ta un otro kolaborashon entre Yumarya Grijt ku Randal Corsen, meskos ku e promé piesa original ku RCO a lansa na desèmber 2017 titulá ‘Henter Aña Den Paranda’. Areglo ta den man di Randal mes, ku a produsí e piesa huntu ku Oscar Bor i Igort Rivas. Banda di e músikonan fiho di RCO, e piesa por a konta ku kontibushon di músikonan invitá manera Ernesto Paz riba bas, Sheena Bishop den koro, i Ulrich de Jesus riba guitara.

5 Producties

E piesa ‘Mi Bon Amigu’ ta e di tres piesa di e sinku produkshonnan original ku RCO lo lansa
riba merkado lokal. Promé ku esaki RCO a lansa e hit ‘Dushi Sintimentu’ kantá pa Dibo D, i e
tumba ‘Un Dia Nobo’ kantá pa Rich Pieter. Ku e proyekto di 5 piesa aki Randal ke duna su
aporte na farándula lokal, regalando pueblo di Kòrsou piesanan popular kantá na Papiamentu, kada un ku un toke diferente. Tur esaki lo no tabata posibel sin e aporte finansiero di Prins Bernhard Cultuurfonds Caribisch Gebied; pues, RCO ta masha agradesido pa e sosten ku nan a haña di PBCCG. Ya RCO ta preparando pa lansa e di 4 tema, ku lo bira un montuno kantá pa Dibo D, i e di 5 piesa tambe ta na kaminda, pa klousurá e proyekto aki. Keda pendiente pa mas di RCO, i tambe pa e Paranda Di Fin Di Aña, ku dia 28 di desèmber awor lo tin su di 6 edishon, kaminda tur e temanan nobo di RCO lo bai zona.

Comments

comments