Errol Brown tabata un persona dispuesto pa yuda na cada momento. Ramon Buckley a traha na LAGO pa 32 aña y despues cu e refineria a cera, el a bay Hulanda, unda cu el a traha 5 aña. Tabata den e area laboral cu el a cera conoci cu Errol Brown, unda cu nan a traha hunto pa varios aña den refineria.
Manera ta conoci, den fin di siman a drenta e noticia tristo di e fayecemento di Errol Brown. Brown tabata un figura masha stima y respeta den comunidad, particularmente pariba di brug, den mundo di Carnaval y tambe pa su ex coleganan di LAGO. 24ora a combersa cu un di nan, pa conoce Errol Brown un poco mas.
“Errol Brown tabata un hende di tur hende. Den su vocabulario nunca e palabranan ‘No Por’ tabata aparece,” Buckley ta comenta. El a conoce Brown, no como un bombero, pero como electricien na LAGO.
Despues el a pasa pa e departamento di bombero, cual el a haci un di esunnan mas safe di LAGO. Un gran persona respeta y reconoci pa su tremendo trabou como hefe di bombero den refineria.
Pa loke ta Carnaval, Brown tabata tin un amor grandi tambe pa Carnaval. Pa e motibo aki, no por keda sin menciona e trabou grandi cu Brown a haci pa Aruba su Carnaval. Su trabou a cuminsa cu Esso Club y despues na Coastal.
Aruba a perde un gran carnavalista y tambe un gran persona.
