RAIZ cla pa sirbi pais: Prome den parlamento awo como minister

Pa seis siman e dos representantenan di RAIZ tabata parlamentario. Ta trata di Ursell Arends y Geoffrey Wever, kendenan ta bay entrega nan retiro como parlamentario pa bira minister y na nan luga ta bin otro dos miembro di partido cu lo bira parlamentario.

Den e ultimo dos luna y pico nan a forma parti di e Constelacion di Parlamento 11 y pa Ursell Arends esaki tabata un momento di honor parti forma parti di parlamento. Aki nan a gana experencia pa siña hopi cos nobo con parlamento ta funciona. RAIZ tabata contento di a forma parti y tambe di a haya sosten pa bira vice-presidente di parlamento. 

mr. Geoffrey Wever, lider di fraccion RAIZ, a expresa cu nan a duna contribucion door di bin cu mocion, aprobacion di mocion unanimamente pa mehora legislacion. A bin cu amienda di “kansspelen”, unda ta drecha un gap cu tabata tin den proteccion legal di e ley. E demas miembronan di parlamento a aprob’e y minister mes tabata na fabor dje cambio. Segun Wever, esey t’e cosnan constructivo pa hiba politica y RAIZ ta contento di forma parti di esey.

Lider di fraccion tin un “background” huridico y ta lamenta cu awo e no lo forma parti mas di parlamento. E ta haya cu e parti di legislacion, traha “wetgeven”, ta un di e tareanan principal di un parlamentario. E ta kere cu e lo a sinti su mes bon pa haci e trabou ey tambe. Pero awo e ta kere cu tin un responsabilidad grandi pa nan den e proximo gobierno y nan ta asumi e responsabilidad ey.

Pa cobertura mas amplio, lesa e edicion di TREMPAN mañan.