Raiz: Aruba no tin mester di mas hotel

Raiz ta preocupa. Nan ta keda vocifera nan opinion riba asuntonan cu tin di haber cu tereno, hasta ora tin proyectonan di hotel cu ta bin.

Ursell Arends, lider di Raiz, a splica cu no ta nan so, pero tin mas ciudadano y NGO’snan den comunidad a vocifera nan mal contento, mirando cu ainda terenonan ta wordo duna, despues di tanto estudio y expertonan ta indica cu Aruba ya ta un isla satura.

Ursell Arends: Aruba no tin mester di mas Hotel

Ursell Arends: Aruba no tin mester di mas Hotel

Posted by 24ora on Friday, February 15, 2019

E minister di infrastructura ta keda brinda oportunidad pa hotelnan keda desaroya. Pa loke ta hotel na Baby Beach, cu a keda publica den tur medio, a indica cu ta trata aki di un hotel All Inclusive di 600 camber y 300 European Plan, cu despues di corto tempo, tambe lo bira All-Inclusive, segun Raiz.

For di un inicio, Raiz tabata contra di mas desaroyo di mas hotel. Durante 2018, a yuda duna caminda y duna input na loke ta trata maneho di medio ambiente. A para firme pa loke ta moratorium. A colecta mas di 7500 firma, cual a entrega tambe na Presidente di Parlamento. A kere, cu mirando e sosten cu tin den comunidad y e seriedad di e topico aki, cu e minister tanto di turismo como esun di infrastructura, lo tene esaki na cuenta.

Dia 20 di April 2018, parlamento di Aruba a pasa un mocion pa moratorium, di cual a exigi diferente punto pa moratorium keda introduci.

Dia 17 di December ultimo, minister di infrastructura a anuncia cu lo bay implementa un moratorium. Ora cu a habri e moratorium cual el a anuncia for di otro, a mira tur e excepcionnan cu tin den esaki, ta un lista di excepcion cu por bisa cu esaki ta un moratorium falso.

Cortesia: NoticiaCla

Dicon ta bisa esaki

Den e lista di excepcion cu a duna, ta papia cla cu e moratorium falso pa construccion di mas hotel y condominium ta encera:

Peticion di construccion di hotel, entrega prome cu 21 di December 2018. Peticion pa construccion di mas camber di hotel, segun acto di erfpacht, pasa caba na notario. Peticion pa construccion di hotel, den centro di San Nicolas y Oranjestad. Peticion pa construccion di hotel na Sero Colorado. Peticion di construccion di hotel di 100 camber of menos riba waf di Oranjestad. Peticion di renobacion y expansion entrega prome cu dia 21 di December. Peticion pa remodelacion y expansion di camber di hotel segun acto di erfpacht pasa caba na notario.

Cu otro palabra, tur camber, tur permiso cu a wordo duna den pasado, e minister no ta para tur. Su moratorium cu el a introduci dia 17 di December ultimo, ta duna oportunidad pa tur e permisonan cu tin caba, tur por wordo construi.

No tin nada pa para esakinan, segun Arends. Pesey ta bisa cu pueblo a haya un satisfaccion, pasobra di berdad tin un hende ta bay tuma paso pa introduci un moratorium, pero na fin di dia a mira cu esakinan ta promesanan falso y pueblo ta esun cu ta sali defrauda. Pesey Raiz, desde un inicio a para fuerte contra esaki y ta sigui para fuerte contra mal gobernacion y corupcion.

Cortesia: NoticiaCla

A manda carta

Raiz a bay cerca e presidente di Parlamento y a entrega carta cu tur e firmanan recolecta. A pidi e presidente di parlamento, sr. Ady Thijsen pa e tambe por follow up, pasobra kier wak e moratorium wordo concretisa den ley.

Te dia di awe, ainda no a tende nada. Pero tin speransa cu esaki por tuma luga ainda, mirando cu tur experto ta indica cu Aruba no mester sigui desaroya mas camber di hotel mirando cu e isla ya caba ta satura y cu mester bay den e caminda pa implementa un modelo nobo di turismo, cual ta basa riba High Value, Low Impact.

Mas cu claro ta pueblo ta esun cu ta bay sali perhudica di mas hotel, mirando cu tin cu sigui importa pobresa. Ya caba den pasado partido MEP a bisa cu “no hay cama p’a tanta gente”. Netamente awe ta e partido MEP ta esun cu ta colabora pa sigui desaroya mas hotel, pa sigui importa mas pobresa. Na final di dia, ta e pueblo ta esun cu tin cu bay carga tur e consecuencianan.

E aña aki ta pagando 230 miyon na interes di debe cu a wordo haci den pasado. Aruba su debe den exterior ta surpasa 4 biyon florin y no tin e fondonan necesario pa sigui inverti den bienestar social.

Sigui crea hotel, ta mas problema social so nos lo sigui crea. Tur indicacion ta mustra esey. Ta pesey tey un biaha mas pa para fuerte. Aruba ta pasando door di un Perfect Storm cual ta categorisa esaki.A publica un prome articulo y pueblo por ta sigur cu den e simannan padilanti, lo sigui cu e serie di e Perfect Storm aki pa pueblo ta prepara y educa kico ta loke ta e consecuencianan pa sigui desaroya mas hotel.

Comments

comments