Recientemente a tuma luga e evento “Ki’ ta bo stem” organisa pa The STEM Embassy. Como parti di e evento aki, Dr. Raisa Rudge a traha un buki di experimento di STEM (Science, Technology, Engineering, Mathematics) specialmente p’e muchanan por haci experimento di sciencia na cas.
E buki titula “Dive into Science with Dr. Raisa” a wordo reparti bou di tur mucha cu a atende e evento di Ki’ ta bo STEM. Pronto, e buki aki tambe lo ta disponibel pa mucha di e STEM camp di Kiwanis San Nicolas. Raisa mes a lanta na Aruba y a constata cu mayoria buki di experimento ta uza ingrediente y material cu ta dificil pa obtene na Aruba. Pa e motibo ey Raisa a opta pa traha su mesun buki dedica na e muchanan di e islanan caribense.
Danki na e ayudo di The STEM Embassy, e prome version di e buki aki a bira un realidad. E version aki ta un pilot version y ta contene 3 experimento y tambe un puzzel y un kleurplaat. Cu e buki aki Raisa kier curasha mucha y hoben pa scoge un carera scientifico of tecnico.
E buki aki ta demonstra e hobennan cu nan mes por haci experimento y cu no ta importa bo edad, identidad of color di cuero.
Actualmente, Raisa ta buscando un fundacion, organisacion of otro persona cu lo por contribui na e proyecto aki y yuda Raisa haci e buki completo un realidad. Pa contribui na e proyecto aki por uza e website: https://gofund.me/3098d578 .
Raisa Rudge, ex-alumno di Colegio Arubano y Colegio San Nicolas (awo conoci como Colegio Nigel Matthew) a completa su PhD na Wageningen University na Hulanda y a ricibi su titulo di Doctor na mei 2021. Dr. Rudge a haci su PhD den e area di tribology (friccion, lubricacion) cu ta cay bou di fisica y kimica. E aplicacion specifico di su estudio ta pa compronde locual ta sosode den e boca di un ser humano (lenga, diente, saliva) durante cu e ta come.
E resultadonan di e estudio ta di importancia pa comprende con nos por produci comestible cu ta mas saludabel (menos sucu, vet mas productonan natural) pero cu ta crea e mesun sensacion di boca (mouthfeel) cu e producto original cu si ta contene vet of sucu por ehempel.
Un di e rekisitonan pa completa un PhD ta pa skirbi un thesis of disertacion. Raisa su thesis ta contene 9 diferente capitulo y mayoria ya caba ta publica como articulo den revista scientifico internacional.
Actualmente, Raisa ta trahando como postdoctoral researcher na The University of Queensland, Brisbane, Australia. Aki Raisa ta investigando e structura y textura di plant-based meats (producto vegetariano cu tin e mesun textura y porcentahe di proteina cu carni).
Tempo Raisa tabata biba na Aruba, Raisa semper a participa na diferente initiativa pa hoben. Prome cu su estudio, Raisa tambe tabata activo como miembro di Parlamento Hubenil. Raisa tambe tabata activo den e mundo di deporte y arte aki na Aruba. Raisa a participa den Koninkrijksspelen varios biaha. Raisa a forma parti di Sparkling Tour na aña 2015 y tambe a formar parti di Gang di Arte.
Actualmente Raisa ta comparti video y tips di sciencia riba un manera fun y facil pa hende di tur edad comprende via Instagram (@RaisnScience). Cu Raisa su experiencia den e mundo di sciencia, Raisa lo kier duna bek na a comunidad di Aruba door di traha material educativo pa mucha y hoben. Pa logra esaki, Raisa ta pidi cualkier persona, organisacion, fundacion of compania cu lo kier colabora cu Raisa pa cu e proyecto aki pa tuma contacto cu Raisa via [email protected].
Manera ya caba a menciona, por contribui na e proyecto aki via e website: https://gofund.me/3098d578
Raisa kier gradici The STEM Embassy y tur e sponsor y participante di e evento Ki’ ta Bo STEM pa nan entusiasmo pa e prome version di e buki “Dive Into Science with Dr. Raisa”.
