Rafael Estrada: Gobierno actual tin hopi determinacion pa ehecucion di e proyecto di Fast Ferry

Te awe no a tende for di e persona principal di e intensionnan di un Fast Ferry. Rafael Estrada ta conta cu pa mas of menos 8 aña pasa, sr. Ton Jansen, kende ta e persona principal di Icasus, a acerk’e pa motibo cu nan a traha hunto na Hulanda.

Sr. Ton Jansen ta un experto riba aviacion y asuntonan maritimo. El a acerca Estrada si e tabata kier ta su counterpart na Aruba pa loke ta e proyecto di Fast Ferry.

E proyecto di Fast Ferry a cuminsa mas of menos 9 aña pasa na islanan Canaria. Ton Jansen tabata tin un dinnerafspraak cu e CEO di Fred Olssen, cu ta e operador mas grandi di Fast Ferries na mundo. Ton Jansen a puntr’e kico mester wordo haci pa trece un proyecto di Fast Ferry Aruba, Boneiro y Corsou. E CEO di Fred Olssen a bis’e, cu e ta kere cu si no tin un Fast Ferry ainda, esey mester ta cu e randvoorwaarden no ta existente pa tin un proyecto di Fast Ferry.

Kico ta e randvoorwaardennan
Segun Estrada, tur departamento di gobierno, di e tres paisnan, mester ta riba e mesun liña. Departamentonan di Douane, di Imigracion, mester ta alinea cu otro pasobra un Fast Ferry tin como condicion cu un turnaround mester wordo haci den 20 minuut, manera cu ta wordo haci na Islanan Canaria.

Ta un proyecto cu a cuminsa y tin e modelo di islanan Canaria, caminda cu tin e ocho islanan di Islanan Canaria, ta wordo conecta door di Fast Ferries. Esey a cuminsa mas of menos 8 pa 9 aña pasa. Na momento cu Ton Jansen a acerca Estrada, a bay papia cu e minister concerni, cual tabata e minister Otmar Oduber y e ora ey a present’e e proyecto y el a trece e proyecto den seno di conseho di minister. Despues a papia cu prome minister Mike Eman y sr. Mike de Meza, y Aruba a tuma un interes den e proyecto di Fast Ferry y a acerca e otro paisnan pa tambe participa den e proyecto.

Awe ta 8 aña mas leu y tin cu bisa cu dos aña pasa a entrega un rapport na gobiernonan di Aruba, Boneiro y Corsou. Dos aña pasa, Corsou y Boneiro a indica cu nan kier sigui cu e proyecto y Aruba no a duna ningun interes. Awendia sa cu e gobierno di e coalicion nobo a inclui e proyecto di Fast Ferry den su programa di gobernacion.

Ta mira cu den e gobierno nobo cu tin, minister Chris Romero, di transporte, tambe tin minister Andin Bikker, kende, durante e periodo anterior tabata parlamentario y tabata un voortrekker pa e proyecto di Fast Ferry, cu awendia ta minister. Tin cu bisa cu tin hopi determinacion pa sigui cu e proyecto aki y lo mas importante, nan a dicidi cu e proyecto aki ta wordo realisa na San Nicolas pa duna San Nicolas e empuhe economico necesario ta bay tin mester, pasobra e situacion na San Nicolas, manera cu sa, no ta mucho di gaba, segun Estrada.