Rafael Estrada: Fuera di un Fast Ferry kier mira mas desaroyo na San Nicolas

Pa loke ta e area caminda tin intension di mara e boto na San Nicolas, tin luga den e refineria. Esey ta e tereno cu ta bin bek pa Aruba.

Segun Rafael Estrada, e tereno cu ta bin bek pa pais Aruba ta na altura di e stacion di Arubus, si benta e muraya abao, y bay lama, for di eynan, tin un pida tereno, ta e prome parti cu lo bin bek pa gobierno. E tereno cu gobierno di Aruba ta bay haya ta for di eynan te na Zeewijk, ta un tereno inmenso, segun Estrada. Tin entendi cu tin hopi otro proyecto cu lo kier bin. Ta papia aki di desaroyo di un Transhipment Center. Tambe parti di directiva di San Nicolas business Association, a pidi na gobierno di Aruba, atrabes di prome minister, si ta posibel, duna e tereno ey full bek na pueblo di Aruba, pasobra kier mira ademas di un Fast Ferry, kier mira un waterfront, kier mira pa tin parkenan ey. Kier wak pa e tereno ey bira parti integral di e desaroyo di San Nicolas. No ta mir’e netamente como un parke industrial. Ta kere cu tin varios ehempel na mundo caminda cu terenonan cu tabata practicamente obsoleto. Tin problema cu e contaminacion cu tin cu wordo afgedempt of mester wordo haci limpi debidamente. Pero e tereno ey ta un tereno cu lo ta bale la pena pa e bin bek pa e pueblo di Aruba.

Costo
Segun Estrada, na Islas Canarias, tin un Ferry ta yega y den 18 minuut 1000 hende ta baha y subi, auto y trucknan ta baha, busnan ta subi y den 18 minuut di tempo e Ferry ta yena y e ta bay. Esey ta e intencion di dje. Tin cu mira un Fast Ferry como un lowcost carrier.

Dia cu Ryan Air a cuminsa, na aeropuerto di Brussel a protesta masha hopi. E prome aña cu Ryan Air a cuminsa bula, Brussel a haya mas di 1 miyon extra di pasahero, door di operacion di Ryan Air. Asina tin cu mira un Fast Ferry. Un Fast Ferry a wordo traha pa e nabega lihe. Mas biaha bo bay un otro destino, hopi biaha mas ticket bo por bende. Esey ta e contesto, segun Estrada.