Radarkamer di Cuerpo Policial a detecta for di oranan tempran di diaberna anochi un boto como 7 miya leeuw for di Aruba. Den cuadro di bon cooperacion entre Cuerpo Policial Aruba (KPA) y Kustwacht (KW) a persigui y gara e boto cu 10 persona indocumenta abordo. A trece e boto y e personan indocumenta pa e base di Kustwacht pa investigacion contra e capitan y su tripulantenan. Tin indicacion cu lo tabatin arma y/of substancianan illicito abordo di e boto. E caso ta den pleno desaroyo y e investigacion lo sigui su curso.
Ministerio di Husticia desde 2018 a logra marca pasonan importante pa optimalisa e ekiponan existente di control. A adapta leynan, a percura pa busca ekiponan nobo y moderno den un esfuerso pa tin miho bista y control na nos costanan. Mirando e situacion regional a haci esfuersonan enorme pa por introduci entre otro un radar y un helicopter pa nos Cuerpo Policial y modernisa nos leynan (AB 2018 no 70, AB 2019 no. 40 y AB 2020 no. 94). Asina a reenforsa nos frontera pa ta bon prepara pa si botonan clandestino yega, por detecta y detene personanan ilegal y retene nan te ora por deporta nan bek pa nan pais di origen.
Pa locual ta e radar mes, na juni 2019 Minister mr. Andin Bikker a firma e decreto pa adkeri un radar masha moderno mes for di e compania Sea Hawk di Noruega. E diferencia di e radar aki y otronan ta cu e ta diseña specialmente pa por detecta obhetonan, den e caso aki boto, hopi chikito y hasta oil spill riba lama.
E situacion cu cada ciuidadano di mundo ta pasando aden actualmente dor di e pandemia ta preocupante, pero aki nos no tin espacio pa mas hende riba nos isla, ya cu Aruba tin su propio retonan laboral, social, economico y awo tambe di Covid19, pa enfrenta.
“E ta keda un reto grandi cu nos ta confronta frecuentemente, caminda grupo di ciudadanonan di otro pais ta purba drenta nos isla den forma ilegal. E ta pone un presion enorme riba autoridadnan local pa purba evita nan entrada y ora nan yega controla nan pa cu Covid-19, zorg pa cupo di retencion na Warda nos Costa y despues pa regla vuelo pa nan deportacion. No solamente e espacio y logistica ta un reto, sino e gastonan adicional cu esaki ta bin cu ne pa nos pais, den pleno crisis dor di e pandemia”, Minister mr. Andin Bikker a comenta.
“Mi ta masha orguyoso di nos departamentonan Hudicial, KPA, Kustwacht, Ministerio Publico y GNC, cu ta traha uni cu un solo meta: mantene nos isla sigur. Masha pabien”, asina e mandatario a termina bisando.
