Ivy Simon-Hernandez, miembro activo di Quota y Chairperson pa e fundraising 2022 tabata diahuebs merdia den programa di Enfoke caminda el a combersa y comparti informacion pa loke ta e Picnic Dansant cu e organisacion social ta bin cu ne proximamente.
A splica cu Quota t’ey bek despues di dos aña cu Covid a stroba y no por a haci nada manera ta custumber. E tema di e Picnic Dansant ta Back To The 80s, evento cu ta tuma lugar otro siman diadomingo dia 27 di november pa 12’or di merdia.
Entrada tin dos luna na benta cerca miembronan. Cada un ta costa 100 dollar y ta inclui un welcome drink y buffet. E ta tuma luga na ballroom di Renaissance Convention Center y lo decora completamente na e decada di 80. E codigo pa bisti tambe ta di añanan ochenta.
Normalmente Robert Jeand’or ta presenta na e evento aki, sinembargo, manera ta conoci, salud no ta permiti esey aworaki. Na su luga ta bay presenta Robert Maduro y Azucar. Simon-Hernandez a indica cu lo tin un sorpresa mas tambe.
E Picnic Dansant di Quota ta un oportunidad di duna bek na comunidad a traves di diferente causa cu e organisacion ta dedica na dje. E placa recauda ta reparti entre diferente instancia den luna di maart. Si ta interesa pa atende y contribui, por yama na 592-2083, pero tambe por pasa personalmente na e tiendanan di Giselle y Maggy’s cu tin ticket ainda.
