Quito Nicolaas: E ley di Supervision financiero lo afecta nos autonomia

Cu e Corona-crisis ta bira mas bisto con Hulanda desde 1986 a traha na un structura pa administra e islanan, den caso cu nan continua cu un maneho cu a lo largo nan no por scapa mas di un situacion di debe. For di un cuminsamento a agrega un funcion pa supervisa un ke otro. Y di e forma aki a crea e Representacion di Hulanda na Aruba (VNO), cu tambe a keda estableci na Corsou y St. Maarten.  E representacion tin un funcion mescos cu di un consulado y ta conseha e ministerio di asuntonan interno. Cu e cambionan estatal di 10-10-10 na Corsou y St. Maarten a introduci CFT pa supervisa e finanzas publico riba e dos islanan aki y e momento ei ainda Aruba por a scapa. Sin embargo na 2015 esaki no tabata e caso mas y a aproba un Ordenanza di Ley pa institui temporalmente e asina yama Colegio di Supervision Financiero (Caft).

Na 2019 Gobierno di Aruba a bay di acuerdo pa institui un asina yama ‘begrotingskamer’, cu lo ta e organo pa supervisa e finanzas publico. E organo aki lo mester continua cu e funcion di Caft y percura pa Aruba haya su autonomia financiero bek. Esta cu localmente door di nos propio expertonan lo supervisa e entradanan y gastonan di gobierno y cu no mas e regie ta den man di Hulanda cu por dirigi un ke otro den un otro rumbo. Un iniciativa pa limita intervencion di Reino cu por afecta nos autonomia y cual merece nos aprecio. Como cu e papel di Caft ta termina na 2021, awo Hulanda ta haci un otro intento y e biaha aki via un ‘Rijkswet Fiancieel Toezicht’ pa ratifica su metemento den  asuntonan interno di nos pais. E Ley di Reino aki cu tin como meta pa controla e destinacion di e sumanan otorga door di Hulanda, mas bien ta un instrumento cu ta en pugna cu e principionan democratico di propio gobernacion. Y manera den practica hopi biaha ta sosode lo tin un diferencia den interpretacion, debi cu Hulanda semper tabata ke men algo otro cu cierto articulonan di e Ley. Debi cu no tin un ‘Colegio di disputa’ pa trata e diferencia di interpretacion den un caso asina, finalmente Hulanda lo haya rason pa motibo cu nan tin e mayoria den e Conseho di ministronan di Reino. Pesey mes ta bon pa studia y analisa e aclaracion di cada articulo di e ley, prome cu acorda esaki.

Cu mester amplia y/of fortifica e papel di algun di nos institutonan, manera Raad van Advies, SER, y Controlaria General, pa asisti gobierno na un miho forma, ta di mes. Cu e prome peticion pa ricibi ayudo financiero – den cuadra di Covid-19 – Hulanda a pone como condicion cu mester bin cu reformanan economico. Esaki a resulta cu empleadonan den sector priva y publico mester a entrega un parti di nan salario. Asina empleadonan publico mester a entrega 5% di nan salario, 50% di nan vakatieuitkering y 50% di nan toelage na november. Tambe ministronan, parlamentarionan y pensionadonan mester a entrega. Hulanda sa mucho bon cu pa evita disturbionan social y instabilidad politico, trahadonan tin un limite cu nan por entrega. Pero pa awo Hulanda bin cu exigencianan adicional – den forma di un ley nobo pa reglamenta e uzo di e yudansa di likidez ricibi – sino no ta duna cen, ta algo cu no ta elegante.  Na un dado momento mester puntra nos mes: Ki validez art. 36 y art. 37 inciso 2b di Statuut tin? Ta bon pa adstrui akinan cu un scenario pa independencia of provincia di Hulanda no ta viabel ni realistico.

Aruba a ricibi un sla duro door di e lockdown y awendia conoce un 75% di desempleo. Den pasado tempo cu Lago a cera su portanan Aruba no a ricibi niun prestamo di Hulanda y nunca a yuda sanea e debenan cu e isla tabata tin na 1985 pa drenta su Status Aparte. Cu e postura asumi den e caso di Covid-19 e relacion entre Aruba y Hulanda a alcansa un punto cu no por sigui acepta y mester coregi e tipo di arogancia aki den Reino. Normalmente mester ta tin un consulta entre e Gobiernonan na nivel di nan conseheronan pa fula tera con e partidonan ta opina encuanto un posibel introduccion di un Ley di Reino pa supervisa e fondonan cu Hulanda ta pone disponibel. Pero atrobe e procedura aki a keda nulifica y unilateralmente a yega na e decision aki.

E problema di Aruba ta cu door di crecemento di e populacion e gastonan di enseñanza y salubridad riba presupuesto a sigui aumenta, mientras cu e fuentenan di entrada y esnan di belasting no ta suficiente pa cubri e gastonan presupuesta. E locual cu mester sosode ta cu Hulanda mester yuda inverti pa ensancha e structura economico di Aruba. For di e Town Hall meeting por señala cu tin un grupo di expertonan local ta trahando na un nivel profesional pa yega na un inventarisacion di posibilidadnan pa innova procesonan gubernamental. E Masterplan aki por ilustra con Aruba ta trahando pa yega na reformanan y restructura e servicionan di gobierno. Den esaki lo ta bon pa Gobierno – atravez di nos Ministro Plenipotenciario sr. G. Besaril – pidi pa cancela e tratamento di e punto di agenda aki, pa motibo cu mester tin un forma di consulta mas amplio na Aruba y na nivel di Reino.