E mucha muhe Quishantely Leito (18 aña) di Rotterdam, descendencia Curasoleño, ta e hoben mas bunita di mundo. Diasabra anochi el a gana e certamen aki di Miss Teenager Universe na Guatemala. El a competi contra 40 otro mucha muhe di diferente pais di mundo.
Dos aña pasa e mucha muhe Hulandes Lotte van der Zee a gana e certamen aki. El a fayece e aña’ki den luna di maart despues di un paro cardiaco. Durante e certamen hubenil aki a tene un minuut di silencio na su memoria. Ora cu Quishantely a gana e titulo na Hulanda aña pasa, Lotte van der Zee tabata den hurado. “E titulo aki mi ta dedik’e na Lotte,” e ganado nobo di Miss Teenage Universe a bisa na Guatemala.
E organisacion di e edicion Hulandes di e certamen aki a bisa cu nan ta hopi contento cu e ganado di e titulo practica dos biaha tras di otro a bini pa Hulanda. E certamen aki ta principalmente popular bou di paisnan Latino. Mayoria di e hobennan a yega cu un team special pa yuda nan. Quishantely tabatin ayudo di solamente su mama Nina Leito. E organisacion di Miss Teen of the Netherlands a yuda for di distancia.
Quishantely a impresiona principalmente durante e ronda di pregunta. “Mi miedo di mas grandi ta mi perde mi mes. Aprecia semper loke cu bo tin den bida. Aña pasa mi a perde mi tata, e ultimo lunanan e tabata sinta den un rolstoel pero asina mes semper e tabata positivo. Nos no ta rico, nos ta biba gewoon na Rotterdam Zuid, pero nos ta biba un bida y e bida ta un regalo, cu semper bo tin cu saa miho di dje,” el a contesta ora cu e hurado a puntr’e cual ta su miedo di mas grandi den bida.
Recientemente el a caba di finalisa su HAVO. Quishantely, conoci como Shanty, ta di descendencia Curasoleño. Un parti di su famia ta biba na Corsou. E ta un hungado di hockey den e ekipo di Leonidas na Rotterdam.
Palabra di pabien ta bay na e hoben aki y su famia cu e corona di Miss Teenager Universe.
