Pueblo ta hopi contento y muchanan ta haya un bon luga pa hunga futbol

E construccion di e mini tereno di futbol cu yerba artificial na S.V. La Fama na Savaneta ta bou construccion actual y ta programa pa keda cla na fin di augustus proximo. E facilidad ta un di minimo seis cu Prome Minister Mike Eman hunto cu BoBario ta trece na diferente punto di Aruba. Nan ta wordo traha durante vakantie pa asina e ta cla pa ora cu scol cuminsa bek y, hunto cune, e temporada nobo di campeonatonan.

Daniel Villasmil, ingeniero di Vasco Enterprises tabata presente na ponemento di e prome bloki cu tabata den man di un Minister President Eman orguyoso di wak e proyecto aki bira realidad. For di awo, e trabou ta cuminsa pa e compania constructor ya cu mester traha e tereno, fundeshi y vloer riba cual ta bay pone e yerba artificial.

“Mi ta kere cu pueblo ta bay ta hopi contento y e muchanan lo tin otro luga pa hunga futbol awo. Probablemente tin cu no ta gusta hunga den santo y awo nan lo tin algo mas atractivo y nan lo cuminsa hunga futbol. Ken cu no tabata hungando futbol, lo wak esaki y bisa: ‘Mi tin di haci esaki,’ y asina nan lo practica hopi,” Villasmil a comenta.

Esey ta e idea tras di e mini turf di futbol, batting cages y otro facilidadnan deportivo cu Gabinete Mike Eman a traha duro pa sea drecha, renoba of construi tur rond di nos isla. E ingeniero ta wak un avance den e cosnan cu por haci despues di scol te anochi. Di e forma aki muchanan lo ta menos riba caya paso nan tin un luga awo pa hunga futbol. “Mi ta kere cu e lo ta un bon cambio pa hendenan di Savaneta,” segun Villasmil.