Accion 21: Pueblo merece un ombudsman cu ta funciona

Miguel Mansur, lider di Fraccion Accion21, tambe tabata presente durante e reunion pa e ley di ombudsman. Mansur a splica cu pa por ancra e ley den constitucion ta necesario pa por tin 14 asiento, ni M.E.P. ni RAIZ tin diescuater asiento pues nan lo mester depende riba oposicion.

Accion21 a pidi pa pasa un amienda p’asina nan por sostene e ley. El a comenta cu dialuna por a tende Edgard Vrolijk comenta cu esey ta un estilo di chantahe. Esaki kiermen cu “manera nan kier e ley mester pasa”, na esaki Mansur ta comenta cu “si pueblo tabata kier esey, pueblo lo a duna boso diescuater asiento”.

Mansur a enfatisa cu mester corda bon cu Vrolijk, Tromp-Lee y tres otro colega t’e mesun parlamentarionan cu a pidi pa baha un minister cu dies y a purba convence pueblo cu dies ta mayoria.

Negociacion, segun Miguel Mansur, ta “fuera di Vrolijk su capacidad”. El a continua bisando cu por wak prome cu e ultimo reunion el a bay den prensa y bisa pueblo pa wak ken ta voor ombudsman y ken no, segun Mansur esey no ta un manera di progresa.

Tur fraccion y parlamentario kier pa bin cu un ombudsman y echo cu no por logra esaki ainda ta keda manera un fayo. Personalmente Miguel Mansur ta culpa Edgard Vrolijk pa e fayo aki pasobra ta su habilidad di negocia y busca consensus a keda chikito. E miedo cu Mansur tin ta cu kico cu mester pasa den e staatsregeling lo bolbe wak e mesun “inteligencia emocional infantil” cu ta prohibi Vrolijk di negocia. Mansur a enfatisa cu tur hende kier e miho pa pueblo y tur kier e ombudsman mas fuerte. Ta duel Mansur cu e ta obstaculisa e proceso aki.

Miguel Mansur ta kere cu ombudsman ta algo berdaderamente necesario pero uno cu ta independiente y cu no ta bou di ningun menasa politico. Locual e por a wak durante e reunion den Parlamento ta un trocemento di berdad. Por ultimo el a menciona cu ta tanto bal ta keda pasa ley si nan no ta funciona. Locual cu nan kier ta un ombudsman cu lo funciona.