Tabata tin un ocasion hopi special na Freezone na Corsou. Steven Martina ta minister di desaroyo economico di Corsou y el a splica cu diabierna tabata Black Friday y pa Freezone na Corsou tabata algo nobo y ta prome biaha cu esaki ta tuma luga. E ta un innovacion pa Corsou. Algo nobo cu ta purba y ta spera cu pueblo lo reacciona en grande pasobra den Freezone por haya mercancianan na un prijs hopi faborabel y via di e Black Friday, kier a habri e oportunidad eynan pa pueblo di Corsou y cu esaki tambe trece mas actividad den e Freezoone.
Freezone pa comerciantenan
Esaki ta algo cu den pasado pueblo tambe por a drenta. Segun Minister Martina, den ley ta para cu 25% di e mercancianan tin e derecho pa bende nan localmente. Na Corsou, en berdad 25% semper pueblo di Corsou por a cumpra den Freezone. Cu e Black Friday aki ta crea un ambiente mas special pa por haci uzo pa keda dentro di e 25% di locual tin mag di wordo bendi localmente.
Gobierno
Na e momentonan aki e Freezone no ta pasando den e momentonan di mas faborabel. Tin un caida den e actividadnan den e Freezone. Esey tin di haber cu e airlift cu a cay atras. Pero esey tambe tin di haber di e diferente competencianan cu tin rond di nan. Sinembargo, nan ta positivo. Tabata un actividad economico cu semper a florece. Ta trahando e plannan necesario pa rebiba e Freezone atrobe y den 2018 por bay mira e resultadonan positivo.
Cambionan di ley
Cambionan di ley pa a cumpli cu reglanan internacional, por ehempel di FATF, Terorismo, etc. labamento di placa, a toca tambe cu a afecta e Freezone na Corsou. Segun minister Martina, no solamente esey, pero e hecho cu bo no tin mag di bende den e Freezone marcanan copia. Locual tabata tin hopi, ta haya por ehempel marcanan manera Adidas, Puma. Pero no tabata esnan real, nan tabata imitacion. E legislacion na Corsou ta pone cu no por haci e tipo di practicanan ey. Como tal tipo di productonan aki no ta bende den e Freezone na Corsou, pero si den e otronan den region. Si mira den punto di bista den Caribe, hopi di e clientenan ta desvia bay pa otro localidad caminda cu si ta permiti bende e productonan aki ainda. Como tal tin un preocupacion pasobra como Corsou, ta cumpli cu e regulacionnan internacional. Otro mercadonan no ta cumpli y di e forma ey ta cay atras.
Ganashi
Freezone ta un actividad economico hopi importante. Segun e minister, e sector aki, Freezone, Logistic, Comercio, hunto ta forma casi 20% di e desaroyo economico, esta GDP.
E minister ta sumamente contento. E actividad aki ta uno nobo y ohala cu por sigui cu diferente tipo di actividadnan aki, pasobra e ta yuda rebiba actividad den Freezone.
