Pueblo a coopera y tres pais a cuminsa suavisa nan medidanan

2272

Dinamarca, Checoslovakia y Austria ta e prome paisnan na Europa cu ta bay cuminsa suavisa e medidanan drastico di coronavirus. Esaki Gobiernonan di e tres paisnan a anuncia.

Na Austria ta pone hopi enfasis pa den e periodo cu ta sigui e hendenan bisti “mondkapjes”.

Sebastian Kurz, Canciyer di Austria, a anuncia dialuna cu tiendanan chikito, “doe-het-zelf-zaken” y mercadonan di flor, ta habri atrobe dia 14 di april bou di condicionnan estricto. Desde prome di mei tur tienda, centronan comercial y pelukerianan lo ta habri atrobe. Hotel- y restaurantnan lo por habri mita di mei.

E medidanan general di lockdown ta keda valido te cu findi april y e scolnan ta keda cera te cu mita di mei. Eventonan si ta keda prohibi te cu fin di juni.

Mondkapjes

“Un reaccion rapido y restrictivo ta duna nos e chens pa den forma mas rapido sali di e crisis aki,” segun e  canciyer Kurz. “Pero solamente si nos mantene nos mes den forma consecuente na e medidanan y traha hunto manera cu nos a haci te cu aworaki.” Principalmente en bista di e fecha di Pasco Grandi Kurz a pidi e hendenan pa evita contactonan social y mantene distancia. El a agrega: Keda cerca e hendenan cu kendenan bo ta biba.

Hunto cu e decision pa suavisa e medidanan, Austria ta amplia e obligacion pa uzo di mondkapjes den supermercadonan, amplia esaki den transporte publico y tiendanan ora cu nan habri nan portanan dia 14 di april, asina Minister di Salubridad Publico Rudolf Anschober a bisa. Por uza un sjal of un dashi tambe en bes di mondkapjes, e oficina di Kurz a bisa.

Dinamarca tambe ta bay suavisa e medidanan drastico di corona. Si e cantidad di casonan nobo y mortonan keda stabiel, entrante 15 di april e scolnan basico y crèchenan por habri atrobe, premier Mette Frederiksen a bisa.

E cambio of adaptacion di e medidanan ta bay paso-a-paso, pa evita cu e cos ta bay malo. E regreso na e bida normal ta bay dura algun luna, Frederiksen a adverti. Gobierno Danes a dicidi cu tur eventonan grandi ta keda prohibi te cu final di augustus debi na coronavirus.

Transporte publico

Mescos cu Austria y Dinamarca, Checoslovakia a haya espacio pa habri e bida publico poco-poco. E siman aki ainda tur construccion ta cuminsa. Deportenan na aire liber ta permiti atrobe.  

Despues di Pasco Grandi e tiendanan lo por habri atrobe y transporte publico ta cuminsa atrobe.

WHO

Organisacion Mundial di Salud (WHO) ta haci un yamado na e paisnan pa no suavisa e medidanan contra coronavirus mucho lihe, ya cu e virus lo por plama atrobe. “E ta mescos cu ora bo ta malo y bo ta baha mucho lihe for di cama,” un bosero di WHO a bis. ‘Bo ta core e riesgo di haya un recaida y complicacion.”