Durante un Rueda di Prensa ku a tuma lugá riba djaweps 8 di novèmber último, Minister di Hustisia Quincy Girigorie, hefe di KPC, señor Mauricio Sambo representando Kuerpo Polisial Kòrsou (KPC) i Fiskal Mayó señor Heiko de Jongh den representashon di Ministerio Públiko (OM) a firma un protokòl di koperashon den e trayekto di optimalisashon di atendementu ku delitonan kontra moral (Samenwerkingsprotocol Optimaliseringstraject aanpak zedenzaken).
Gobièrnu di Kòrsou a proklamá luna di novèmber komo luna di konsientisashon pa prevení abusu relashonal den nos komunidat. Ademas internashonalmente tambe ta dediká atenshon spesial na konsientisashon pa ku e tema di abuso relashonal. Komo ku e tema abusu (relashon i seksual) ta haltu riba agènda di e kadena hudisial na Kòrsou, firmamentu di e protokòl aki ta un paso konkreto pa logra atendé ku esaki debidamente.
E protokòl en kuestion ta kontené palabrashonnan en kuantu koperashon, kordinashon i ehekushon di aserkamentu di kasonan penal ku ta trata delitonan kontra moral. E trayekto aki ta regulá tambe prosesonan di trabou, mantenshon di lei i kondishonnan ku e diferente partnernan mester tene kuenta kuné, di akuerdo ku tratadonan ku tin di aber ku e tema aki.
Trato di e víktima
E tipo di delitonan aki tin un impakto grandi riba bida di e víktima en kuestion i ta un echo ku e víktimanan konserní, generalmente ta keda troumatisá pa basta tempu. Pa e motibu aki e kadena hudisial mas i mas ta poniendo atenshon na e trato ku e víktima ta risibí di parti di partnernan den e kadena. Esaki ta enserá ku tantu e kalidat di investigashon di e kaso komo e salú físiko i síkiko di e víktima mester keda garantisá ora ku ta apliká métodonan di investigashon.
‘Zeden unit’
Un resultado konkreto di e protokòl di kooperashon aki ta un ‘zeden unit’ adekuá den e kompleho di di KPC na Rio Canario kaminda lo tin espasio pa entre otro un kamber di dòkter ful ekipá, spesialpa atendé ku víktimanan di delitonan kontra moral, di moda ku e víktima por risibí un trato digno. Tambe lo tin un área spesífiko einan kaminda lo skucha tantu e agresor, e víktima komo otro personanan relevante den e kaso.
Aparte di esaki lo entamá un trayekto di profeshonalisashon di e personal den e kadena hudisial ku ta trata ku víktimanan di delito kontra moral; tur esaki pa garantisá trato korekto di e víktima di delito kontra moral i salbaguardiá su derechonan.
‘Aanwijzing Zeden i Richtlijn Strafvordering Zedendelichten’
Prokuradó General lo formulá tantu un ‘Aanwijzing Zeden’ komo un ‘Richtlijn strafvordering Zedendelicten’ den kua duna entre instrukshon kon pa atendé ku denunsia, keho i tur loke ta relashoná ku investigashon den e kasonan aki. Implementashon di e trayekto di optimalisashon aki lo dura dos aña i lo keda di monitòr den e asina yamá ‘driehoeksoverleg’, kaminda Minister di Hustisia, Ministerio Públiko i KPC ta reuní ku regularidat pa diskutí prioridatnan di e kadena hudisial. Ademas Minister Quincy Girigorie ya a papia ku vários partner sosial pa traha huntu riba un proseso di konsientisashon pa ku e tema di abusu relashonal i seksual. Ministerio di Hustisia lo sigui enkaminá e proseso aki den estrecho koperashon ku Ministerio di Asuntunan Sosial i partnernan sosial.
