Otro siman ta habri cu protesta di un otro grupo di trahado na un otro parti di nos isla. Awe tabata e grupo di trahadornan cu ta mantene limpiesa canto di caminda rond di nos isla. Por lo menos un di e trahadornan aki, sr. Fanchy Tromp di Santa Cruz, ya a haya retiro.
Otro trahadornan a haya carta di advertencia cu lo bay kita nan di trabou. Un di esnan cu a haya carta di advertencia ta Papi Palm cu ta traha canto di caminda for di aña 2001. Trahadornan y nan famia a haya sosten di partido AVP den nan protesta contra di e amenasa y retironan door di gobierno di MEPORED.
Awemainta tempran prome cu nan a bay traha, nan a reuni na cas di Papi Palm den Playa Pabou pa hunto expresa nan desaprobacion contra di e desicionnan cu e minister di DOW, Otmar Oduber y gobierno di MEPORED a tuma. Den voz di e homber y muhernan aki por a sinti e dolor, e preocupacion y hasta e rabia cu nan tin pa motibo di e situacion cu gobierno a hinca nan aden.
BELASTING
E motibo cu minister Otmar Oduber y gobierno ta usa pa menasa y retira e contratistanan cu ta traha canto di caminda ta cu nan debe belasting! Niun hende sinembargo ta kere cu esey ta e motibo real pa amenasa y pa kita nan fo’i trabou. Loke ta e caso ta cu e minister ta busca luga pa duna amigo y famianan un contract asina. Pa e motibo aki ta kita hende fo’i trabou pa traha luga pa esnan cu e kier favorece politicamente. Anto ta net e trahadornan cu ta simpatisa cu partido AVP, e minister ta amenasa y kita for di trabou. Niun otro!
ABUSO DI PODER Y PERSECUCION POLITICO
Loke minister Otmar Oduber ta haci ta persecucion politico. Pasobra cuanto hende y negoshi no debe belasting? Pero den un pais democratico niun hende tin mag di perde trabou pasobra nan debe belasting? Cuanto hende a perde trabou pasobra nan debe belasting? Pesey e motibo cu e minister ta usa ta ridiculo! Si ta e belasting gobierno kier haya, anto e no ta kita hende for di trabou. Al contrario e ta yega na un areglo pa paga tur luna. Den caso di algun di e trahadornan aki ya tin un areglo di pago y tur luna ta kita un suma halto for di e placa cu nan ta haya. Asina mes ya a kita contract di un di nan. Pa e minister paga belasting no ta basta. E ta kita nan for di trabou y ta amenasa otronan cu retiro!
Awor sin trabou manera Fachi Tromp, ta con e ta bay paga belasting cu e debe? Pa no papia mes di con e ta bay paga banco pa su cas y su pick-up of con e ta bay cria su famia! Tur esaki minister Otmar Oduber y gobierno di MEPORED no ta tene cuenta cun’e. Sin niun gevoel of sentido di responsabilidad humano, ta amensa y kita trahadornan di trabou. Awor bou di tur otro contratista y trahado cu contract ta reina inseguridad, temor pa perde trabou, preocupacion pa mantene nan famia y paga nan cuentanan. Serca hopi ya e temor y preocupacion a bira rabia. Pa hende manera Fanchi y Papi cu tin tanto aña ta haci e trabou aki caba, bou di tur gobierno, ta incribel cu e gobierno di Aruba ta haci esaki cu su propio ciudadanonan. Pero pa nan y otro trahadornan, cos no ta keda akinan!
