Prosedura Venesolanonan indokumentá no a kambia

Minister di Hustisia, Sr. Quincy Girigorie, ta desmentí enérgikamente ku ta laga Venesolanonan indokumentá sin mas liber na Kòrsou. Kòrsou i outoridatnan hudisial manera Wardakosta, Polis, Toelatingsorganisatie i Duana, ta sigui kontrolá rigurosamente i hasi detenshon na momentu di yegada ílegal di Venesolanonan indokumentá. Esaki Minister di Hustisia a komuniká tambe na Kònsùl Venesolano.

Ayera a surgi un situashon di emergensia, ora ku despues di a detené un grupo di Venesolano, a akohé 42 persona den e baraknan pa estranhero den un espasio ku ta adekuá pa solamente 10 persona. E situashon aki ta algu kompletamente inhumano segun Gobièrnu. Pa e motibu aki outoridatnan hudisial den diálogo ku Minister di Hustisia, konsientemente a registrá e personanan konserní i tambe a hasi – te kaminda tabata posibel – un investigashon di eventual antesedente kriminal. Despues ku esaki a tuma lugá, a laga – ku sierto sintimentu di trankilidat – 28 persona, esta 21 hende hòmber i 7 hende muhé liber a base di un desishon ku efekto suspensivo. Intenshon ta pa saka e personanan aki ainda for di pais asina ku e posibilidat presentá. Ta trata aki di un desishon di emergensia.     

Ayera nochi ta bolbe detené un grupo di Venesolano ku a trata na drenta Kòrsou ílegalmente. Pa medio di un fayo di komunikashon sinembargo a laga abusivamente e grupo di detenido aki tambe liber. Esaki a krea e impreshon ku Kòrsou ta duna suidadanonan Venesolano sin mas akseso di estadia. Esaki ta apsolutamente inkorekto. E prosedura ku ta sigui ta ku te ainda ta hiba tur detenido prison (SDDK). Einan ta hasi un investigashon hudisial minusioso, kaminda ta hasi uso di tantu listanan lokal komo internashonal (entre otro pa medio di Interpol) pa averiguá mas tantu ku ta posibel si ta trata aki di hende ku un pasado kriminal. Tambe ta laga hasi un inspekshon médiko minusioso. Seguidamente ta detené esnan ku tin un karchi penal òf ku a kometé kualke forma di delito. Finalmente ta akohé esnan ku no tin un pasado kriminal den baraknan pa estranhero, te na momentu ku surgi e posibilidat pa ekstraditá nan.

Temporalmente tin un skarsedat di fasilidat adekuá den e baraknan na Koraalspecht. Pa motibu di destrukshon e kompartimentunan ta den mal estado. Ku ayudo di Hulanda ta trahando na e momentunan aki pa oumentá e kapasidat di akohida. Banda di esaki no tabatin buelo entre Kòrsou i Venezuela ya pa dos siman. Tambe ta asina ku Wardakosta a intensifiká búskeda di personanan den boto rumbo pa Kòrsou. E labor di mehorashon di e baraknan ta avansá di tal manera ku na komienso di siman benidero por kuminsá akohé atrobe mas detenido. Pa e motibunan aki a hasi un eksepshon grandi, kaminda a base di un obligashon di mèldu a laga esnan liber ku despues di skrinmentu a resultá di no ta forma ningun klase di menasa òf estorbo pa komunidat. Esaki na momentu ku nan por a demostrá ku nan tin lugá pa keda. Banda di esaki Gobièrnu i outoridatnan hudisial ta tratando di tur forma na remediá e posibilidat pa mas pronto ku ta posibel manda Venesolanonan indokumentá ku ta detené bèk nan pais.