Recientemente, Oscar Siegfried Henriquez, un gran Arubiano a bay laga nos. Un Arubiano multifacetico cu a destaca su mes como deportista, empresario, politico y gobernante. Como deportista e tabata conoci como esgrimista, futbolista y tenista. Como lider den deporte Oscar Henriquez a contribui hopi den directiva di varios “bond” deportivo (p.e. ABBA-Amateur Baseball Bond Aruba) y como presidente di ASU – Arubaanse Sport Unie.
Como empresario Oscar a funda Pelican Tours cu ta un di e grandinan di Aruba. Como politico y gobernante Oscar Henriquez a laga un legado di exito especialmente den turismo. Oscar Henriquez y Juan Enrique “Juancho” Yrausquin tabata esnan cu a planta e mata di turismo cu awe ta duna su frutonan como e pilar mas importante di nos economia. No tin duda cu Oscar su aporte na Aruba ta enorme. Pero Oscar a haya e reconocemento cu e merece di Aruba? Ningun stadion, ningun caya, ningun edificio ta carga su nomber.
Ami kier propone un cambio. Di e careteranan cu ta bay pa e areanan di hotel, un ta carga nomber di Juancho Yrausquin, e otro di e empresa Sasaki (Associates). Sasaki Associates su unico rol den nos turismo tabata pa concretisa un plan pa maneha tera den area di turismo segun meta y criterionan cu gobierno a presenta. Esaki a sosode mas di 20 aña despues cu e epoca di turismo na Aruba a cuminsa, mas di 20 aña despues cu Aruba Caribbean Hotel a habri su portanan!
Aunke mi tin hopi aprecio pa e plan cu Sasaki a desaroya, mi ta kere cu ta mas logico cu e dos careteranan den e area di turista carga e nomber di e dos Arubiano cu a lucha banda di otro pa trese turismo na Aruba. Mi ta propone pa cambia e nomber di Sasaki pa Oscar Henriquez Boulevard.
Mi lo dirigi un carta na Straatnamencommissie pa formalisa e proposicion aki y mi ta spera cu e lo haya apoyo di tur Arubiano.
Skirbi pa Clyde Harms
