Pronto lo cuminsa pa amplia staff riba bus di salud

Ibisa ta hopi contento cu recientemente a papia cu algun graduado di EPI di enfermeria y pronto nan lo cuminsa di amplia e staff riba bus di salud cu algun enfermero recien studia. Esey ta hopi interesante, pasobra asina aki e generacion nobo cu a caba di gradua den e ramo di salud, lo bay contribui tambe na promocion di salud den nos comunidad. Monique van Embden, directora di Ibisa, ta spera cu asina ey por yuda hiba e mensahe di salud pa comunidad y tambe entre nan generacion, den nan grupo di edad ta promove salud. Ta hopi entusiasma pa cuminsa cu un team mas amplio riba bus di salud pronto y ta spera cu comunidad tambe lo ta mesun entusiasta ora nan topa e crew nobo di bus di salud.

Personal nobo
Awor aki ta den e proceso pa entrevista algun graduado mas, pero e idea ta pa cuminsa cu 2 of 3 riba e bus di salud, cu ta yuda cu midimento, cu ta yuda cu e procesamento di e datonan pasobra esey tambe ta tuma tempo, no ta solamente trabao cu ta mira riba bus di salud. Pero tambe e parti cu ta tuma luga despues. Procesa e datonan, analisa e datonan, pa asina por duna e informacion bek na e bishitante, pero tambe na e organisacionnan. E ta depende ainda ki espacio por crea. Ideal ta bisa cu tin tres y asina ey por rouleer.

Orario
Sa haci excepcion. Pero preferiblemente ta haci’e durante di dia normalmente. E ta entre 8’or y 3’or, pero sa pasa tambe pa ocasionnan special cu ta haci’e riba un diasabra por ehempel. Tin biaha ta haya un congreso cu ta tuma luga durante fin di siman, unda cu nan tambe ta coopera. Tur ta depende di e palabracion cu ta haci cu e hefe di departamento di salud, sra. Iraida Thijsen y con por logra haya un cooperacion di e team di e bus di salud. Nada no ta imposibel. Ta custuma di traha flexibel na Ibisa. Hopi actividad ta tuma luga fuera di oranan regular y hopi biaha ta trata di actividadnan di deporte, movecion. Pero sa pasa tambe cu actividadnan di salud ta tuma luga fuera di oranan regular. E team di salud tambe ta disponibel pa e ora ey duna su cooperacion, segun van Embden.