Durante un conferencia di prensa yama pa Stichting Oasis of Love, cu ta un fundacion cu desde 2013 ta den operacion y desde december ultimo a bira oficial. A papia di loke ta e trabounan cu nan ta haci.
Meta di Oasis of Love ta pa sirbi y yuda den comunidad riba problemanan social, duna conseho, yuda den bario, tambe yuda den areanan caminda cu tin necesidad. Lila Mackaay, presidente di Stichting Oasis of Love, a splica cu nan a presenta un proyecto nobo cu yama Centro Alegria, hunto cu Angelique Geerman y Michael Croes.
Angelique Geerman a introduci e centro. E ta un meta cu a pone p’adilanti pa logra. Geerman a splica cu desde cu su mayornan a fayece, e tin un ruman homber cu nan ta encarga di dje cu ta special y a pasa den hopi situacion dificil ora cu mester a bay den exterior pa salud di su tata.
Nan no tabata tin un caminda unda cu e ruman homber por a keda temporalmente. Na Aruba solamente tin centro pa nan por biba y no tin un centro unda cu por brinda ayudo pa ora of pa dia.
E ora Geerman y su ruman muhe a soña cu nan kier logra algo asina. Esey ta un necesidad grandi cu tin na Aruba. Nan a acerca Stichting Oasis of Love, cu mesora a bin cu e proyecto, a haya un greenlight y apoyo incondicional pa e proyecto aki.
A cuminsa sigui cu e proyecto y aworaki t’asina leu cu por a presenta esaki na pueblo di Aruba.
E proyecto aki ta un centro unda cu mayor y famianan por acudi. Si e famianan tin un fiesta of nan tin un reunion, of si nan mester biaha pa vakantie of dokter, e centro aki ta brinda e opcion cu nan por bin keda temporalmente den e centro, no pa biba.
Lo brinda e servicio cu nan por bin keda pa ora, pa dia, pa siman y pa un periodo di tres luna.
Tambe apart di esey, ta bay tin un dagverblijf, un pasadia, pa por yuda tur e personanan aki. E demanda ta hopi grandi pa e muchanan aki y ta bay combin’e e ora.
Kico ta e meta
E meta ta pa na april, tin e apertura aki. Kier habri e centro den vakantie di Pasco grandi, cuminsando cu un camp. Na comienso di februari ta cuminsa inscribi pa e camp na april.
Por tuma contacto cu Angelique Geerman na 5940378 of tambe cu Lila Mackaay di Oasis of Love na 7426516. Asina por haci inscripcion y busca informacion.
Na e centro aki ta brinda un espacio “safe”, un luga cu cuido profesional pa e personanan special. Di e forma aki, si e famianan kier biaha, bay un reunion of kier bay un fiesta pa un fin di siman, nan sa cu e personanan aki lo ta den un bon cuido cu profesional y cu nan por ta trankil.
E personanan por sinti nan na cas. Esey ta e meta y cu ayudo di Aruba y di tur hende, nan lo por logr’e. E ta un proyecto hopi bunita y e ta algo cu mester di dje na Aruba.
Ta pidi comunidad pa uni, yuda manera semper a haci, pa por logra e meta aki.
E Centro lo ta na Santa Cruz. Awor aki ta bay cuminsa prepara e luga pa cuminsa cu e proceduranan pa inscripcion y haci loke falta den e cas. E rueda di prensa en cuestion ta pa duna informacion di kico lo bin cun’e y haya ayudo e ora pa logra e meta di e Centro aki.
Cuido
Michael Croes, ta forma parti di e team di Centro Alegria. Su tarea ta pa e parti di logistica, esta e materialnan cu tin mester pa e luga. Manera ya ta conoci, e luga lo ta na Santa Cruz. Despues ta bay tin un otro rueda di prensa pa divulga e luga exacto pa e apertura oficial.
E parti di logistica, esta e materialnan pa haci esaki posibel, ta bay ta cama, ta bay tin mester di mesa di comedo, ta bay tin mester di matras, ta bay tin mester di stoel pa sala, stoelnan di plastic, frigidaire, ta bay tin mester di airco.
Pakico tur esakinan
E proyecto aki a nace mas cu un aña pasa door di e rumannan Geerman. E tabata un soño cu nan kier a bin cun’e. Pero e inversion ta bira hopi grandi pa nan por haci esaki posibel. Ta pa e motibo aki mes ta acudi na e comunidad di Aruba, pasobra Aruba ta biba cu e personanan special.
Dado caso cu si un di e mayornan mester bay un reunion di trabao of mester bay curso di trabao, entre otro, ta bira hopi dificil pa por acudi na esaki, door cu por ta un di nan miembronan di famia, ta un persona special.
Ta pa e motibo aki mes famia Geerman a bin cu esaki. Ta conta cu pueblo su aporte masal pa por yega na e meta aki, pa asina pa na februari/maart of april, ta full completo, pa asina por haci un apertura oficial na e luga aki.
Si kier mas informacion, lo brinda esaki si tin cualkier cambio, cu e numbernan di telefon of kico nan haya como contribucion. Lo haci esaki via nan pagina di Facebook, cu ta Centro Alegria of via prensa.
Croes ta probecha pa gradici e persona encarga di e logo di Centro Alegria, Gerald Rasmijn y Rasmijn Production. Manera el a tende cu tin e proyecto cual ta regarda nos hendenan special, di biaha el a tuma contacto y a pidi pa sinta pa asina haci esaki posibel.
Ta gradici’e di curason pa e aporte aki. Ya caba tin hende cu a cuminsa yama cu nan ta interesa den e proyecto y ta wak cu e ta asina importante.
