Promocion di e pelicula “Huicio Perfecto” di Aruba a sali

Recientemente a sali e “trailer” di e pelicula “Huicio Perfecto” dirigi pa Angelo Croes. E grabacion y edicion di henter e pelicula tabata den man di Roy Croes. Despues di casi 2 aña di hopi preparacion, grabacion y edicion, awor a keda cla cu e “trailer” mientras cu den e siguiente dianan e pelicula completo lo ta cla pendiente su estreno riba pantaya grandi. Ta un pelicula graba na Aruba mes, cu artistanan local y cu sin duda lo causa un impacto ora mire den un sala grandi di pelicula.

E trabounan rond di e proyecto aki a inicia na aña 2017 y a inclui no menos di 30 actor di Aruba. Banda di e actornan tin mas di 100 figura local cu a participa activamente den e pelicula, cu ta graba den nos propio idioma, papiamento. 

Pelicula graba y edita na Aruba, presenta pa actornan local na papiamento ta cla pa estrena riba pantaya grandi. "Huicio Perfecto" ta un storia skirbi y dirgi pa Angelo Croes, cla pa acapara atencion mundial.

Pelicula graba y edita na Aruba, presenta pa actornan local na papiamento ta cla pa estrena riba pantaya grandi. "Huicio Perfecto" ta un storia skirbi y dirgi pa Angelo Croes, cla pa acapara atencion mundial.

Posted by 24ora on Saturday, October 12, 2019

E pelicula “Huicio Perfecto”, di 1 ora y 40 minuut, ta inclui escenanan romantico, accion, drama y hasta un poco humor. E ta conta e storia con Aruba a hunga un rol masha importante, es mas, tabata e yabi clave den mundo di petrolio. Pero, separa di e industria petrolero, tambe e storia ta encera un cartel criminal cu tabata bou di investigacion di un escuadron elite di Polis. 

A graba e escenanan na varios sitio riba nos isla, manera na edificio di Corte, den un hotel, den area industrial, den Marina Pirata Restaurant, den Franse Pas, na Fermin’s Bar, riba parkeerplaats di Do It Center na Shaba y mas. 

E elenco principal ta inclui Altoinspector di Polis (den bida real), Alvin Molina como Django Maduro, Gionathan Croes como un Polis, Abigail Sanchez como Jessy, e conocido Manuel de Silva a hunga pa Max Harms, Stephanie Croes como psicologo Dr. Angela de Cuba, Alegandro Dirksen cu tabata Fiscal di Ministerio Publico, Luty Martinez como Hues y Joylene de Nobrega como Narianna.

Separa di e artistanan saliendo riba pantaya, e pelicula aki lo no tabata posibel sin e sosten profesional di e conocido musico Martin Buitenweg. E ultimo aki a percura pa e musica y efectonan di zonido moderno den e pelicula. e ta e compositor musical di e pelicula netamente Arubiano aki.

​Un fecha exacto no tin ainda pa estrena e pelicula, pero lo por spera di mir’e riba pantaya grandi prome cu fin di aña ainda. Tin hopi espectativa, specialmente si mira e elenco di personahenan conoci pa nan trabou den bida real, pero cu awor lo demostra nan habilidad, creatividad y nan pasion pa actuacion, den un rol completamente diferente.​