Prome turista Mericano a muri di Covid-19 na Aruba

Diamars ultimo Dr. Horacio E. Oduber Hospital a confronta e prome caso fatal di un turista contagia cu Covid-19. E tabata interna den hospital pa algun tempo caba, luchando cu su salud. E problema tabata cu, separa di Covid-19, e tabatin varios otro complicacion serio, entre otro obesidad pisa. Un ke otro no a yud’e den e proceso di recuperacion y a mas bien empeora su condicion cu resultado fatal.

E turista, un hende homber procedente for di Merca, pero naci na Rusia, tabatin 73 aña di edad. El a bin Aruba pa pasa algun dia di vakantie, sin sa cu e tabata contagia. El a yega contagia caba cu e virus. Hecho ta cu el a bira malo lihe despues di a descubri sintomanan y no a dura mucho cu mester a hospitalis’e pa tratamento medico avansa. El a permanece algun dia den cuido intensivo ICU y a bira basta malo.

Ta despues di 10 luna cu Aruba a conoce e prome caso di Covid-19 riba nos isla, cu un turista ta fayece riba nos isla. Ta conoci di casonan caminda turistanan a contagia pero a logra regresa Merca bek pa sigui tratamento avansa na nan mesun pais of a recupera satisfactoriamente na Aruba mes y a regresa cas sin sintoma y sin virus. Por corda e prome caso dia 13 di maart mes tabata un turista cu a regresa Merca den air ambulance e tempo ey.

Fuentenan a sigura cu e turista aki, mescos cu tur otro cu bin Aruba, ta sigura y cu seguro lo cubri e gastonan di su tratamento den hospital y awor tambe pa mand’e bek Merca pa eynan regla su entiero. Awendia, prome cu subi avion pa Aruba, mester download un app den bo celular den cual ta registra un PCR test negativo recien of mester paga 75 dollar pa haci un test nobo na aeropuerto di Aruba. Tambe, separa di esey, no-residentenan mester paga un suma diario pa tin un Covid-Insurance, specialmente pa cubri si acaso contagia y mester di tratamento medico, hospitalisacion, etc.

Entretanto departamento di Relacionnan Exterior hunto cu e oficina di Migracion y Duana Mericano staciona na Aruba ta preparando tur asunto legal pa por transporta e curpa sin bida di e turista bek pa su pais natal. Palabranan di condolencia y hopi forsa na su famia den e momentonan dificil aki.

Mester menciona cu na hospital tin mas turista malo interna cu Coronavirus. Danki Dios cu e mayoria ta mehorando y ta mustra cu pronto nan lo por sali for di hospital pa regresa nan pais bek. Hopi biaha e turistanan ta yega Aruba sin sa cu nan ta contagia. Ta te ora cu sintomanan presenta, ta busca cuido medico pa por sali di e retonan cu nan salud.