Recientemente Prome Minister, mr. Evelyn Wever-Croes a entrega e prome reconocimiento di “Outstanding Innovator” na mr. Sharin Luydens, Director e Departamento di Registro Civil y Censo. Ta e prome reconocimiento den un lista di mas di e tipo di reconocimientonan asina cu Gobierno tin pensa di haci den e temponan nos dilanti. Di e forma aki no ta laga innovacion pasa pa casualidad, sino ta bin cu su reconocimiento.

Motibo di e reconocimiento special aki ta pa su iniciativa den implementa e proyecto innovativo pa digitalisa e departamento. E servicio cu ta brinda na clientenan a improvisa considerablemente, danki na su esfuerso pa encurasha y inspira su coleganan pa ofrece e miho di nan.

Despues di e sirbi comunidad como Polis pa hopi aña, Sharin Luydens a studia ley y a bira un hurista. Asina na aña 2009 el a asumi e posicion di Director di Departamento di Registro Civil y Censo. Mesora a nota un cambio drastico den maneho y e nivel di servicio a drecha den forma notabel pa comunidad. Paralelo cu mehoracion di servicio, na aña 2010 a cuminsa implementa proyectonan di digitalisacion, co sosten financiero di Fondo di Desaroyo (FDA) entre Aruba y Hulanda.

Awendia mayoria documento ta digital na Censo y no mester recuri mas na papel y documentonan pa por repasa e status civil di ciudadanonan. Mas ainda, e departamento ta cla pa bay na e siguiente nivel di servicio, den cual mayoria documento oficial di Gobierno por bay online.

Comments

comments