Prome Minister Evelyn Wever-Croes, despues di e reunionnan intensivo cu a tuma luga diahuebs 31 di januari, entre e tres Prome Ministernan di Islanan di Reino, a expresa di ta sumamente contento y satisfecho un biaha mas di con e reunionnan a encamina. Esaki tawata e di tres cumbre entre e Prome Mandatarionan di Aruba, Corsou y Sint Maarten cu e meta pa delibera hunto riba e puntonan di interes mutuo. Di e manera aki, e tres paisnan ta estrecha lasonan entre e paisnan pa mantene cooperacion. Pa concretisa y structura e cooperacion aki entre e paisnan, diahuebs anochi, e tres Prome Ministernan a firma e Convenio di Savaneta.
Prome Minister Evelyn Wever-Croes a indica cu den pasado tabata tin cooperacion pero e tabata a base voluntario. Desde principio, e tres Prome Ministernan actual ta traha hopi bon cu otro y e interes comun ta pa logra cu e cooperacion aki sigui den futuro tambe, y no depende solamente di e tres Ministernan Presidentenan actual.
E palabracion cu a wordo concretisa den e Convenio di Savaneta ta cu e tres Prome Ministernan di Aruba, Corsou y Sint Maarten lo bin hunto por lo menos un biaha cada 6 luna pa elabora riba temanan nobo cu por bini pero principalmente pa trata e palabracionnan cu ta haci den e encuentronan.
“Na e momento aki, tin hopi bon cooperacion entre e Prome Minister di Corsou y e Prome Minister di Sint Maarten y mi persona. Mi ta spera cu den futuro tur e Prome Ministernan di e paisnan por mantene e cooperacion cu otro tambe. Y e acuerdo cu nos a firma, ta e base pa e lasonan entre e paisnan di Reino bira mas firme y nos por traha hunto na bienestar di e paisnan”, Prome Minister Evelyn Wever-Croes a expresa.
Na final Prome Minister di Corsou, Eugene Rhuggenaath, Prome Minister di Sint Maarten, Leona Marlin y Prome Mininster di Aruba, Evelyn Wever-Croes den un ambiente ameno y dilanti di presencia di Minister di Finansa di Aruba, Xiomara Ruiz-Maduro, Minister di Finansa di Corsou Kenneth Gijsbertha, y Minister di Finansa di Sint Maarten Perry F.M. Geerlings a firma e Convenio di Savaneta.
