Fin di siman pasa Minister President Evelyn Wever-Croes tabata na Washington pa reunionnan cu State Department, IMF y Worldbank. Durante e reunion tabata central pa cuminsa reestablece confiansa bek den Aruba, specialmente riba e tereno financiero.
Durante e prome biahe pa Washington di nos Prome Minister, e mision tabata pa introduci Prome Minister na autoridadnan Mericano y pa reestablece confiansa den Aruba.
Tabata un placer pa na final di e reunionnan scucha di ehecutivonan di entre otro IMF cu nan tin confiansa atrobe den Aruba y su Gobierno. Na prome luga pasobra Prome Minister Evelyn Wever-Croes ta un fiscalista y tin dominio di belasting, cual ta crea un base di confiansa serca e institutonan cu e Gobierno ta determina pa atende cu e temanan financiero di berdad.
Pero mas importante ta cu IMF tin confiansa den e Gobierno nobo di Aruba pasobra esnan cu awe ta Minister ta papiando e mesun idioma tempo cu nan tabata den oposicion y a cuminsa tuma pasonan significativo pa atende cu e problemanan financiero di nos pais, asina e comunicado di prensa di Gobierno ta indica.
CITGO Y VENEZUELA
E tema di refineria CITGO y e situacion na Venezuela tambe a wordo trata na State Department. Di parti di autoridadnan Mericano a demostra nan preocupacion pa cu e situacion aki y a keda palabra cu lo sigui monitorea e situacion hunto. Mescos cu Aruba, autoridadnan Mericano ta sigui di serca e pasonan di e refineria. E sancionnan cu Merca a impone riba e refineria ta medidanan severo cu a afecta Aruba tambe, sinembargo un biaha mas a bira obvio cu ta trata di un situacion cu nos no por controla.
Importante ta cu Minister President a trece padilanti e interes di Aruba pa di un banda desaroya su economia pero na mes momento mester ta hopi alerta cu nos no ta atraendo inversionnan dudoso. E esfuerso aki ta conta cu sosten di State Department tambe, cu lo haci di su banda pa Aruba por atrae mas inversion Mericano den futuro.
Riba tur tereno mester bisa cu Minister President Evelyn Wever-Croes cu e biahe aki pa Washington, a crea confiansa y speransa bek den Aruba.
