Den conseho di Minister decision a wordo tuma cu Prome Minister di Aruba, Sra. Evelyn Wever-Croes lo bay encabesa un comision cu ta bay encarga cu caya Betico Croes.
E comision aki ta consisti di Minister di Infrastructura debi cu caya tin di haber cu infrastructura, Minister di Economia debi cu ta trata cu comercio den caya, Minister di Husticia door cu ta trata di orden publico, Minister di Transporte mirando cu ta trata di transporte y particularmente door cu ta trata e tema di parkeermeters y tambe Minister di Turismo cu kier haci Caya Betico Croes un experiencia turistico excepcional. Meta tras di e comision aki ta pa trece bek bida den Caya Betico Croes pasobra esey ta e pulso di nos economia. Esaki tabata un compromiso den campaña y esaki ta locual cu Gobierno di Aruba lo cumpli cu n’e tambe. Nos lo bay trece bida y vibracion cu mester tin den nos Caya Betico Croes for di mainta te anochi haciendo compras mas placentero. Caya Betico Croes lo wordo desaroya como un centro cu restaurantnan unda cu famia y amigonan por bay sinta come hunto na final di un dia di trabou of den fin di siman. Nos tin vision pa pone apartamentonan riba pisonan mas halto di e edificionan pa asina por tin movecion constant.
Den e prome reunion cu e comision lo discuti entre otro con e structura tabata den e gobierno anterior cu no ta mucho cla ainda. Tin entendi cu tabata tin un organisacion cu yama Obid pero esaki no a haya mucho sosten di gobierno anterior. Pa e motibo aki tambe a pone Caya Betico Croes bou di maneho di Minister President pa mustra e interes cu Gobierno di Aruba tin pa drecha e situacion di Caya Betico Croes y trece bida bek den su caya y tiendanan. Prome Minister ta invita henter e comunidad di Aruba pa nos sostene nos comercio local y nos comerciantenan y Gobierno di su banda lo percura pa e experiencia di pueblo den Caya Betico Croes lo ta un inolvidabel ora bo ta haci bo compras.
