Prome Minister Wever Croes: E pakete di Hulanda riba mesa no ta cla pa acepta

941

Prome Minister Evelyn Wever Croes den un conferencia di prensa pa 10’or di mainta a informa riba negociacion cu Hulanda, e desaroyo y con Aruba ta para te na e momentonan aki.

Awe tabatin reunion di Conseho di Minister di Reino. Aruba no tabata oficialmente riba agenda, ya cu tabata den negociacion caba cu Hulanda. Gobierno a bin ta negocia a base di puntonan cu ta necesario pasobra no por acepta y loke ta haya como reaccion despues di dialogonan cu stakeholder.

“Ami no ta participa pa kibra DNA di e Arubiano y loke a lucha asina hopi y a logra. Pero no ta pone na riesgo bienestar general di pueblo tampoco. Nos kier mantene autonomia y logra cu no tin hamber y pobresa bou di e pueblo. Pa esaki mester logra un economia fuerte, Prome Minister Wever Croes a bisa. E mandatario ta satisfecho pasobra negociacionnan ta avansa bon pero no por bisa cu e pakete cu tin riba mesa ta cla cu por acepta.

Supervision financiero, Landspakketten (medidanan pa fortifica economia), Rijkswet ta e tres puntonan cu Hulanda a pone riba papel como condicion pa saca un man pa yuda e isla.

Pa loke ta Supervision Financiero, esaki ta existi caba via di CFT pero mirando cu ta prome biaha cu Hulanda ta bay presta Aruba placa, nan kier regla e control di esaki via di un Rijkswet. Ta concentrando pa mira kico e Rijkswet aki ta. E ta inclui cu ta bay re-financia debe di Aruba pa dos aña na 2 porciento. Awo Aruba mester fia pa paga debe y deficit financiero. No ta bay haya e placa aki presta mas riba mercado internacional. Nan no ta interesa pa fia Aruba placa. Hulanda ta haci esaki pa Aruba na 2 porciento. Pa dos aña no mester preocupa pa rating di agencianan internacional pasobra nan no mester evalua Aruba pa haya prestamo. “E ta un bon paso. E deseo ta pa mas largo, ya cu Hulanda lo gana placa riba e prestamo aki haci na Aruba, ya cu nan ta hay’e na un interes mas abou,” Prome Minister a bisa.

Aparte di esey, Hulanda ta bay financia tur loke cu mester pa inversion den mantencion na Aruba of inversion nobo, cu por ta na cero porciento.

Importante den e Rijkswet pa Aruba ta cu mester tin fecha di salida. Ta negociando riba esaki. A logra un formula di salida: 3 aña sigui cu surplus norm; jaarrekening y accountants verklaring cu ta mustra cu surplus ta di berdad. Pa 2039 Aruba mester a baha su debe na 50%. “Mas lihe paga debe, mas lihe por sali afo.”

Pa loke ta Landspakketten, a splica cu Hulanda ta presta placa pero kier ta sigur cu ta paga bek. Nan kier ta sigur cu ta dal e pasonan pa fortifica economia cu lo duna e isla e espacio pa por paga e debe. P’esey ta yuda pa yega na entradanan solido via di reforma cu ta 80% di loke Aruba tabata trahando riba dje caba pa logra cu e meta di fortifica economia.

E Masterplan ta guia Aruba y Gobierno ta traha pa logra cu esaki ta forma parti di e landspakket. Tin punto cu no por a bay di acuerdo cu nan manera e edad di pensioen cu nan kier pa ta 67 aña na 2025. Aruba a bisa cu mester bin un estudio y a logra cu awo ta papiando di hacie 66 aña pa 2025.

Pa loke ta e aspecto di Dolarisacion no tin prioridad prome cu 2022. Ta bin estudio prome y e pais ta defini kico ta bay pasa.

E mandatario a keda enfatisa cu e entidad aki no por dicidi cual accionnan y di cual compania ta bende. Gobierno ta dicidi y Parlamento mester aproba. Pero si kier doorlichting riba situacion financiero di e NV y e Corporate Governance cual ta aspectonan cu e prome minister a bisa di ta di acuerdo cu esaki. Tin companianan cu no ta dunando resultado y Gobierno tin cu hinca placa den dje (nan).

Riba husticia tin preocupacion cu lo mira kico por haci, pero te awo no a negocia ningun punto den e area di husticia.

Pa loke ta e entidad mes (cu tur ayudo mester bay via di esaki), a baha y limita y poder di e entidad cu no ta sinta riba stoel di Gobierno of Parlamento. Riba varios punto mester consulta, tambe e nombramento di hende.  Principionan democratico di e pais ta ancra den esaki.

Na final e mandatario a ripiti cu no tin deadline pa e negociacionnan. Den negociacion normal tin deadline. Pero tampoco por bisa cu tin tempo ilimita. E deadline ta Aruba su rosea financiero y no kier ta lomba contra muraya pasobra e ta desbentahoso den cualkier negociacion. E rosea por yega te na inicio di september.