Shelter in Place mas estricto den dianan benidero

Prome Minister Evelyn Wever-Croes a bin cu extra medida pa e dianan di fiesta, esta fin di siman di Semana Santa. Esaki ta cuminsa diahuebs na momento cu toque de queda cuminsa pa 9:00PM y ta termina te cu diasabra 6:00AM. Tur esaki tin di haber pa evita di contagio di coronavirus.
Tanto diabierna como diadomingo tur luga lo ta cera, segun e mandatario.

Diasabra anochi e toque de queda lo continua, pero den dia e “Shelter in Place” ta sigui. Durante e toque de queda di ambos dia tur luga ta cera, cu excepcion di pompstacion, boticanan, dokter y luganan cu ta duna servicio di delivery si lo ta habri.

E mandatario a bisa cu e medidanan ta mas fuerte, y un biaha mas ta recorda cu tin e samenscholing verbod, esta prohibi di bini den grupo di 4 of mas hende. Prome Minister Wever-Croes a bisa cu grupo di 4 of mas ta prohibi pa bini hunto na lama, den park, haci bishita of ta hunga domino bou mata.

Biniendo cu e medidanan aki ta pa evita pa sigui plama e coronavirus. Te cu na e momentonan aki a contente e virus y Gobierno kier sigui mantene esaki. E mandatario ta recorda tur hende pa sali menos durante e dianan di fiesta y pa mantene na tur e medidanan.