Prome Minister ta bay analisa problema na Traimerdia

E reunion cu SEPPA y representantenan di trahadonan di Traimerdia a tene cu Prome Minister Evelyn Wever Croes no a dura ni mey ora. Nan lo mester spera te cu diaranson awo pa haya un contesta di e Prome Mandatario, kende ta bay busca mas informacion riba e diferencia di opinion cu ta existi entre esnan di Traimerdia y e Minister encarga.
Henter diabierna mainta te cu merdia trahadonan di Traimerdia y simpatisantenan di nan causa tabata den accion pa mustra nan malcontento cu e intencion di Minister di Enseñansa Rudy Lampe pa trece cambio den e Vision y Mision di Traimerdia.
Magaly Brito, Secretario General di SEPPA, hunto cu su miembronan, ademas di entrega un Manifiesto na Minister di Enseñansa, a papia cu Prome Minister y a combersa cu diferente Parlamentario tambe.

Na final el a splica cu e cambionan ta encera cu centrum leidernan y esnan cu ta guia e parti di hacimento di huiswerk, ta wordo kita of adapta, cu ta mustra cu e servicio di e grupo aki no ta uno importante of halto. E tristo, el a bisa, ta cu e cambio ta encera cu na final ta e muchanan ta bay dicidi si nan ta haci nan huiswerk of no, si nan kier hunga wega, scucha musica, etc. E cambio aki ta haci cu e trabou di e lidernan lo no tin contenido, y nan ta keda pega, pasobra  nan posicion no tin ningun futuro. E preocupacion aki a keda expresa den un carta entrega na Promr Minister.
Brito a bisa cu nan tin basta luna trahando pa soluciona e problema aki. For di november aña pasa a pidi e Minister tur documento pa evalua e cambionan y pa mustr’e unda e posicion huridico di e trahadonan ta keda afecta, pero nada. Awo na vispera di cierre y apertura di aña escolar e asunto aki no ta soluciona. El a recorda cu Traimerdia ta un programa cu hopi mayor ta depende di dje pa yuda nan yiunan, pasobra hopi biaha ambos mayor ta traha.