Prome Minister, Sr. Eugene Rhuggenaath, a risibí representantenan di e sindikatonan PFWC, APRI i SGTK

Riba 1 di ougùstùs 2017 Prome Minister, Sr. Eugene Rhuggenaath, a risibí representantenan di e sindikatonan PFWC i APRI. Meta di e reunion tabata pa informá e sindikatonan riba e progreso pa ku e trayekto pa modernisá e refineria.

Prome Minister ta konsiente ku ta importante ku representantenan di e sindikatonan di e trahadónan ku ta laborando na refineria ta ser informá riba e ultimo desaroyonan pa ku e trayekto ya menshoná. Partidonan a papia riba diferente tópiko ademas a kompartí pensamentu pa loke ta trata entre otro e motibu pa e kambionan na e addendum, e ultimo desaroyonan pa ku e negosashonnan ku Guangdong Zenrong Energy, i e nesesidat pa sinta mas pronto posibel ku representatenan di PdVSA. Tambe tabata presente na e reunion e presidente di MDPT ku a duna e  representantenan di e sindikatonan informashon enkuanto di proseso i tambe kontestá preguntanan  ku e sindikatonan ta tin.

Ademas Prome Minister, Sr. Eugene Rhuggenaath, a sinta mesun dia ku representantenan di e sindikato SGTK ku ta representá e trahadonan ku ta traha pa e kontratistanan ku ta hasi trabou na e refineria. Prome Minister ta konsiente di e rol importante ku e trahadónan aki tin pa e refineria i a haña na su lugá pa duna e representanan di SGTK informashon pa ku e ultimo desaroyonan pa ku e proseso. Durante e reunion e presidente di MDPT tambe tabata presente pa duna informashon nan rekirí.