E retiro duna na Marisol Lopez Tromp tabata e prome tema noticioso di e conferencia di prensa di Gabinete Wever Croes riba diabierna mainta. “E tabata un decision fastioso, di kita un minister for di su trabou. Pero no tabata por otro, pasobra e no a laga otro solucion.”
Gobierno a tuma e decision aki pa motibo a bira dificil traha hunto, den Conseho di Minister. Tabatin problema pa unidad di maneho den Gobierno. Si tuma un decision den Conseho di Minister, ora di sali pafo, tur mester papia e mesun idioma pa no crea duda, manera loke cu a pasa siman pasa diahuebs den parlamento. “Na momento cu un minister crea duda di un decision tuma den CdM, e ta crea duda den henter e CdM. Esaki mester evita pasobra pueblo tin suficiente cos na su cabes.”
Di otro banda, pa algun siman caba tin un problema entre e partnernan den coalicion. “Ora cu a cera e acuerdo di gobernacion esaki tabata entre MEP, POR y RED. Pero pa algun siman caba tin e impresion cu nos ta den un coalicion di 4, incluyendo Marisol Lopez Tromp cu no tabata sinti su mes comodo den ningun partido.” Otro problema ta cu tabata atacha integridad di algun minister sin presenta prueba, cual no ta bon den un gobierno.
Desde siman pasa, el a bisa, Lopez Tromp, a hinca su mes den problema cu parlamento cu no facilmente por sali di dje. No por ignora cu e fraccion cu ta sostene, e kita e sosten cu nan tabatin den dje. Constitucion ta bisa cu ora no tin confiansa, e minister mester baha. Y mirando cu coalicion no tabata apoy’e mas, e Gabinete tampoco tin apoyo, ora cu tin leynan den cual tin tur minister envolvi, e ta haci e situacion hopi dificil.
Marisol Lopez Tromp no ta reacciona
Prome minister a bisa cu e tabata kier a papia cu Lopez Tromp prome cu tuma un decision, pa mira con e ta kere cu e por sigui funciona, mirando parlamentarionan lo no apoya nada di dje.
“Tres dia tras di otro na tres diferente ocasion mi a trata di haya contacto cu ne. Pero e no a presenta pa bisa kico ta posicion di con e por funciona den e gobernacion. E ultimo biaha hasta via di secretaria el a confirma cu e lo presenta pa e reunion, pero no a haci esaki. E no a presenta pa e reunion di Conseho di Minister tampoco pa cual a cuminsa cu e proceso pa pidi su retiro. A busca conseho huridico, democratico y constitucional pa cana e caminda corecto.”
E mandatario a mustra su decepcion cu su ex colega no a “show up” pa ningun reunion.
E proceso ta cu ta propone e retiro na gobernador, kende ta consulta cu parlamento y despues a bay di acuerdo. Tur cos a bay rapido, mirando e informacionnan cu tabata haya cu e ex mandatario tabata pone presion pa tuma hende na trabou y entrega terenonan. “El a haya suficiente oportunidad pa atende cu e asunto aki y no a haci’e. Hasta el a nenga di reuni cu mi persona. Nos ta sigui cu shete minister enbes di 8. Mi lo percura pa un maneha transparente y integro.”
