Prome minister: No por midi desaroyo di un pais solamente cu infrastructura

Diahuebs a tuma luga e reunion publico den Parlamento di Aruba riba e topico di Presupuesto pa DOW. Prome Minister Evelyn Wever-Croes a splica e meta di e presupuesto aki y con esaki ta pas den e cuadro di e vision di Gabinete Wever-Croes 2. Prome Minister a adresa algun tema cu a bin di varios Parlamentario p.e. RWZI, e tema di retonde, tambe riba funcionamento di DOW y e workflow cu tin na DOW. Ta di remarca tambe cu Prome Minister a contesta e preguntanan di cada Parlamentario.

Prome Minister a enfatisa cu actualmente Aruba ta para na un crusada importante mientras cu nos ta saliendo di e pandemia, di e efectonan mas devastador di e pandemia y den e fase aki, e enfasis di Gobierno ta e parti di recuperacion. Recuperacion den tur sentido. 

“Nos vision no solamente ta pa nos ‘bounce back’ pa nos ta riba e nivelnan prome cu Covid bek, sino nos ta ‘bounce forward’ pa eventualmente nos ta miho para cu prome cu covid. Kiermeen un desaroyo, recuperando tur loke nos a perde y drechando loke e tempo ey caba no tabata bon”, Prome Minister a expresa.

Pa esaki, Prome Minster a bisa, tur miras y enfasis ta riba e desaroyo economico pasobra esaki ta loke ta bay saca Aruba di tur e diferente crisisnan cu nos tin na Aruba. Ta e desaroyo economico ta bay crea cupo di trabou, trece progreso, bienestar y trankilidad den nos hogarnan. Desaroyo economico ta bay yuda nos sali di e problemanan financiero cu a wordo causa principalmente pa covid. Ta danki na e desaroyo economico nos por bay bringa e efectonan di nos problemanan social, nos por trece mas siguridad, nos por mehora nos calidad di cuido y salud. 

Nos infrastructura ta parti di e desaroyo aki. Prome Minister a accentua cu no por midi desaroyo di un pais solamente na infrastructura pero nos mester pone den balansa cu loke ta haci pa e recuperacion di nos pais poniendo e ser humano central. 

“Den e cuadro aki mi a tende awe mainta den e reunion aki, cu ta parse cu Gobierno ta para keto. Esaki sigur no ta berdad. Gobierno ta trahando hopi duro. Nos a lora manga for di e prome dia apesar cuanto crisis a bin cerca nos. Nos a enfrenta nan y nos a surpasa nan. Nos ta traha duro riba recuperacion pero den balans y esaki ta hopi importante pa enfatisa, nos no ta inverti den klinkers y asfalt so, nos ta inverti den e ser humano prome. E cuido y calidad di bida. 

Claro nos sa cu tin dolornan den comunidad cu ta afecta e calidad di bida. Tin barionan cu no tin hopi atencion, tin casnan decai, tin careteranan cu no ta den bon condicion, tin problema di cachonan riba caya. Tin varios cosnan cu ta pasa den nos barionan cu ta afecta nos calidad di bida. 

Pero e prioridad ta trabou digno cu pago digno pa tur mama y tata di famia. Baha e presion social, baha e presion di insguridad, anto e ora nos ta bay percura tambe pa nos careteranan ta bon y pa nos barionan ta bunita”, Prome Minister Evelyn Wever-Croes a expresa den su disertacion den e reunion publico den Parlamento pa trata e tema di Presupuesto di DOW.