Den presencia di Su Excelencia Gobernador Alfonso Boekhoudt y un grupo grandi di stakeholdernan, UNESCO a organisa un “Training Workshop for the co-construction of a biosphere reserve in Aruba”, na JOIA Aruba by Iberostar. A habri e sesion cu un discurso optimista di Prome Minister mr. Mike Eman, cu a subraya su vision pa un Aruba cu ta uni crecemento economico cu proteccion di naturalesa.
E reto mas grandi cu Aruba tin pa futuro ta con nos por sigui crece economicamente y, na mes momento proteha nos medio ambiente. Ta obvio cu no por sigui den e rumbo y velocidad cu ta desaroyando Aruba na e momento aki. Mester para keto y reflexiona, y e momento ey ta awo. Aruba no por sigui solamente cu un agenda di crecemento, pero mester busca un ekilibrio cu ta sirbi pueblo y naturalesa pareu.
Premier Eman a subraya cu Gobierno ya a inicia cu dialogo strategico cu e sector hotelero y stakeholdernan den comunidad y a comparti e mensahe di e vision y inspiracion. Un desaroyo duradero y sostenibel ta solamente posibel si e ta den harmonia cu nos naturalesa. E vision pa crea algun biosfera rond di Aruba mester expande y idealmente cubri Aruba completo. Aruba por fungi un bes mas como un nacion modelo, un ehempel den Caribe, cu ta mustra con progreso y sostenibilidad por bay man den man.
Premier Eman a referi tambe na e legado di Aruba como un Center of Excellence di UNESCO den transicion energetico sostenibel, y a convoca comunidad pa pensa mas leu cu e necesidadnan inmediato. Aruba mester mira mas leu: no solamente kico nos ta desea awe, pero kico nos kier laga atras pa nos pueblo y pa nos isla. Awo ta e momento pa pone nos ambicion personal un banda y traha pa un vision comun pa futuro.
Como prueba concreto di esaki, recien Gobierno a anuncia un plan di reforestacion pa planta cien mil mata riba henter Aruba. Universidad di Wageningen a traha un raport extenso y cu esaki, Gobierno a traha e “blueprint”. Aruba ta para na un crusada: sigui cu e modelo di crecemento di pasado, of uni pa crea un legado di sostenibilidad cu lo inspira generacionnan cu ta bin.
