Den cuadro di un reunion importante yama pa Prome Minister mr. Mike Eman, hunto cu Minister di Infrastructura drs. Rene Herdé y e instancia relevante manera DLV, DIP y FCCA, a trata e situacion cu ya algun tempo ta afecta hopi famianan na Aruba: E falta di traspaso legal di casnan di FCCA pa nan doñonan legitimo.
Durante bishita den diferente bario, hopi habitante a expresa nan preocupacion directamente na Prome Minister Eman tocante un situacion cu nan ta considera inhusto. Ta trata di 99 famia cu a paga completo pa nan cas via huurkoop, pero nunca a ricibi e acta notarial cu ta duna nan derecho legal como propietario.
Na momento di haci e ultimo pago di nan huurkoop, hopi ta esnan cu a keda sorprendi cu tabatin otro obstaculonan administrativo y tecnico cu tabata impedi e traspaso final. Un di e obstaculonan principal ta cu algun di e terenonan riba cual e casnan ta construi, no tin marcacion oficial pa determina e area exacto di cada tereno.
Pa e retonan aki, Gabinete AVP-Futuro a pone prioridad riba busca solucionnan structural, pa yega na un registracion y traspaso legal, y asina duna siguridad y paz mental na e famianan afecta. Durante e reunion, a logra un acuerdo firme cu e stakeholdernan presente, cu pa fin di 2025, tur e 99 casnan lo keda marca formalmente y traspasa na nan respectivo doño.
