Ultimo dianan tabatin basta conmocion, entre otro na Aduana, Cuerpo Policial y DOW, tocante posicion huridico di e ambtenaarnan. Prome Minister Evelyn Wever-Croes a expresa cu e ta lamenta cu e ambtenaarnan mester warda hopi tin biaha pa haya locual nan tin derecho riba dje. “Nos meta ta pa ambtenaarnan no mester bay Corte pa por haya loke nan tin derecho riba dje. No tur ora por culpa un solo instancia, mirando cu tin algun caso complica cu ta concerni mas departamento”. Prome Minister a duna un resumen di e departamentonan concerni.
DEPARTAMENTO DI RECURSO HUMANO (DRH)
Pa loke ta e Departamento di Recurso Humano (DRH), e departamento aki ta conta cu un scarsedad na personal y esunan cu ta traha eynan ta haci lo maximo pa duna conseho y stipula maneho. Pa por duna e consehonan, ta depende di e hefenan di departamento mes.
DRH su ekipo di hurista mes ta esun cu ta defende e casonan den corte.
CUERPO POLICIAL
Pa un proceso di promocion cuminsa, e ta den man di e departamentonan mes. Varios di e personanan cu ta sinti nan perhudica, ta wordo perhudica door di esaki. Minister di Husticia tin atencion p’e situacion, pa mira con por soluciona e problema aki. E casonan cu ta pega na DRH tin atencion di minister-president pa atende nan cu prioridad.
ADUANA
Recientemente tabata tin critica di parti di e sindicato di Aduana riba Minister di Finansas debi na un caso den corte. Den e caso aki cu personal di Aduana a gana, e discusion tabata con frecuente e douaneronan ta haci uzo di nan auto priva pa trabou. Esaki ta un informacion cu ta solamente e douaneronan y Director di e Departamento di Aduana por stipula, no e Minister di Finansas. Awor cu tin claridad cu nan ta haci hopi uzo di nan auto, lo aumenta nan compensacion.
DOW
Recientemente DOW a cuminsa cu un proceso di reorganisacion pa e departamento por cumpli cu exigencianan den e desaroyo nobo na Aruba. DOW ta haci esaki hunto cu Deloitte.
Den reunion cu henter e personal a duna cada un e garantia cu ningun hende lo perde trabou den e proceso pasobra DOW tin scarsedad di personal. Pues tur empleado di DOW por ta trankilo.
LANDSPAKKET
Den cuadro di Landspakket tin hopi cambio na caminda riba tereno di maneho di personal. Esakinan ta wordo discuti cu e sindicato- y hefenan di departamento. E estudionan ta kedando cla y proximamente lo duna mas informacion riba tur e cambionan. E maneho di personal lo bira mas eficiente, cu e proceduranan standard di evaluacion di tur personal di gobierno, y den caso di evaluacion positivo, e empleado publico lo ricibi su promocion hopi lihe.
