Pa loke ta e mision na Hulanda pa loke ta minister di finansas, prome minister Evelyn Wever-Croes a menciona cu Hulanda ta hopi impresiona di e gobierno nobo di Aruba.
E ta comenta cu den e ultimo lunanan tabata tin e secretario di estado Knops, cu a logra combersa cu minister di finansas, Xiomara Ruiz-Maduro, como tambe cu minister Glenbert Croes y tambe Andin Bikker, y a haya e impresion di kico cada ken ta bezig cun’e den liñanan grandi.
A haya hopi elogio pa e forma responsabel, pero specialmente transparente cu ta atendiendo cu tur e temanan. Na Hulanda mes, na e momentonan aki ainda nan ta bezig ta revisando e plan financiero di Aruba. Den e plan financiero a elabora den cuanto tempo lo trece Aruba den un situacion di deficit di 0. Esta ta saca Aruba for di deficit y hinca Aruba bek den e situacion cu no tin deficit, sino surplus den e presupuesto.
Naturalmente no ta algo cu bo ta haci di nochi pa mainta. E no ta algo cu bo ta haci di un aña pa otro. A pidi un periodo di 4 aña y lo elabora extensamente dicon ta 4 aña tin mester. Riba esey tin combersacionnan andando ainda, pero pa gobierno e ta cla. E ta duidelijk. E caminda pa cana, gobierno a stipul’e. E caminda aki ta cu e aña aki ta hala faha mara. Cu otro aña ta reforma e sistema di belasting y cu esey, bay p’adilanti y na mesun momento sigui baha gasto. Y esey sigui padilanti cu mester por yuda cu pa 2021 tin un surplus, pero den forma structural. No cosnan bunita pinta riba papel. Un rapport aki, un rapport aya, un ley, manera gobierno anterior.
Esakinan ta basa riba calculacionnan realistico riba kico pueblo por carga di berdad, pa asina por trece un bienestar pa e pueblo. E bon ta, den tur esaki, cu den e presupuesto, apesar cu tin auterisacion cu ta causa hopi dolor, apesar cu tin rebaho di gastonan, toch tin inversionnan den e areanan cu tin mas den necesidad. Por ehempel e area social, area di husticia, area di enseñansa, e area di siguridad. E inversionnan ey tey den e presupuesto y por atende cu e problemanan mas serio den nos comunidad. Apesar di e momentonan dificil financieramente cu nos ta pasando.
Crisisheffing
Den e reaccion cu CAFT a emiti dos siman pasa, ya caba nan ta describi esaki como un paso significativo, e prome paso significativo cu Aruba ta tuma den su historia, pa soluciona e problema financiero structuralmente. Tambe cu e presupuesto, a base di e crisisheffing ta haci’e un presupuesto realistico. Esey ta contrarion na tur e otro biahanan cu nan a bisa cu e presupuesto di gobierno anterior ta irealistico. Esey ta loke CAFT ta bisa. CAFT tabta kier pa nan bay un extra mile, y pa toch adicionalmente baha e deficit cu 35 miyon extra. Esey a logra door di bati na porta un biaha mas na e companianan estatal y pidi nan tambe pa bolbe hala faha mara y entrega na Gobierno un parti di dividendo adicional, cual a logra tambe. Loke CFT den su carta di dos siman a pidi, tambe a logra caba. Tur esey ta bayendo parlamento hunto. Kiermen, prome minister ta considera cu pa prome biaha pa hopi aña, Aruba ta den cumplimento cu loke CFT a conseha.
Hulanda di su parti ta bisa cu loke CFT bisa, ta bon pa nan. Riba e tereno ey ta bon pa 2018.
No ta haci esaki pa tene Hulanda contento. Ta haci esaki pasobra ta kere cu esaki ta e unico manera cu por libra nos futuro generacionnan di e prijs caro y e mal maneho cu tabata tin den pasado. Naturalmente de paso cu bo tin Hulanda contento, ta un beneficio, e ta un meevaller, pero no ta haci’e pa Hulanda. E cos aki ta haci’e pa Aruba, pasobra cu e compromiso di Gobierno ta e bienestar di e pais aki.
