Prome minister: Grupito di trahado cu no kier coopera cu 12.6% ta hopi bon paga

1924

Diego de Cuba, como presidente di sindicato STA, a pone un ultimatum pa Utilities c.q. Gobierno pa nan  cumpli den e caso di kita 12.6%. E ultimatum di e sindicato ta pa no kita nada di salario di e trahadonan di NV Elmar, ya cu de lo contrario ta bay tin consecuencia.

Riba esaki prome minister, Evelyn Wever-Croes a comenta cu e ta na altura cu ta biba un descontento, un preocupacion bao di un grupito di trahado na Aruba.

E grupo di trahado cu a keda cu trabao hopi bon paga, e grupo cu a pidi pa mustra solidarismo y duna 12.6% di nan salario pa asina yuda esnan cu a perde tur cos.

“Nos sa cu tin un mal contento,” e mandatario a bisa den e programa di Hans Geerman na TOP FM den oranan di mainta. T’asina cu Utilities a informa prome minister cu tin un mal contento na WEB y Elmar, pero tambe e sa di trahadonan na otro companianan estatal.

E mandatario ta compronde di un banda, ya cu mescos cu cualkier otro persona, e ta cansa di e pandemia aki. E ta cansa di e efectonan cu tin riba Aruba.

Ora cu e pandemia a dal na maart aña pasa, gobierno a perde 80% di su entradanan. Ora perde e entradanan aki, no tin placa pa paga su gastonan, sino 20% so. Mester bay na cada empleado publico, ambtenaar, contractant, pensionado y bisa nan cu no por paga full e salario. Si ta gana 2 mil florin, ta paga solamente 400 florin. Pero no a haci esaki y a busca financiamento na Hulanda pa toch por paga parti di e salarionan y parti di e gastonan. Hulanda sinembargo a pone condicion, el a splica.

Hulanda a bisa cu ta presta e placa sin interes pero e no ta bin sin condicion. Un di e condicionnan ta cu tur empleado publico y empleadonan semi-publico, mester entrega 12.6% di salario. E empleadonan publico a haci’e. Claro no a haci’e cu smaak. Minister y parlamentarionan a entrega 25%. A haci un apelacion tambe na esnan den sector semi-publico, esta no full gobierno, pero si cu ta sea ricibi placa di gobierno of ta duna gobierno placa, pa nan tambe den forma di solidarismo entrega 12.6%, pa cumpli cu e condicion cu Hulanda a impone riba Aruba, pa haya financiamento y cuminsa rescata nos pais.

Si no tuma e financiamento di Hulanda, Aruba lo a kibra. Awo cu tin un grupito di trahado cu ta traha na Elmar, na WEB, na Arubus, no ta contento cu nan tin cu mustra un forma di solidarismo di 12.6%. Nan ta poniendo na riesgo full e financiamento cu Hulanda ta dispuesto pa duna Aruba.

Si ta cos cu ta hayando tur entrada manera antes bek y no mester placa di Hulanda, no ta problema pasobra Aruba mes tin entrada. Pero aña pasa a cera Aruba cu un recuperacion di turismo di 30% so,  60% a perde na entrada di turismo y a cera aña na recuperacion di 30%.

Si a recupera 30% so, ainda gobierno no tin suficiente cen pa por cubri gastonan y gastonan cu a baha considerablemente.

Banda di e hecho cu ta un condicion di Hulanda pa haya financiamento pa por paga cuido di salud, siguridad di nos polisnan, enseñansa pa yiunan di e grupito aki, ta pidi pa mustra solidarismo pasobra 11.650 persona a perde nan trabou den 2020 y ta haya FASE, cu no ta bini di Hulanda. Aña pasa el a costa 42.2 miyon florin cu a bini di esnan cu a entrega den salario y cortamento den presupuesto.