Prome Minister: Gabinete Wever Croes a fortifica democracia na Aruba

1888

Durante e reunionnan den Parlamento na comienso di e siman aki, Prome Minister Evelyn Wever-Croes a elabora riba e 10 pilarnan di integridad den maneho di Gabinete Wever-Croes y con esakinan lo keda ancla pa sigura integridad den gobierno y den politica. Integridad ta un medio pa yega na un meta y riba esaki Prome Minister a duna splicacionnan amplio na Parlamento.

Un di e metanan ta pa yega na e tratado di Nacionnan Uni contra corupcion y pa e tratado aki por ta aplicabel na Aruba tambe. Esaki ta e pilar number 9 pa sigura integridad. Pa Aruba e tratado aki ta ratifica caba pero e no tin un ‘volledige medegelding’. Aruba mester tin e leynan menciona anteriormente ‘in place’ prome anto despues por aplica pa e tratado aki tin “volledige medegelding” tambe. Prome Minister Evelyn Wever-Croes a expresa su deseo pa e Parlamento aki completo por demostra cu integridad ta hopi importante pero si no ta esun aki, e siguiente Parlamento si lo demostra e importancia aki.

“Mi ta sigur cu mayoria den nos comunidad ta comparti e deseo pa Aruba logra tur e metanan aki”.

E di 10 pilar pa sigura integridad cu Prome Minister a elabora riba den e reunion publico den Parlamento e comienso di e siman aki ta e Commissie versterking democratisc bestel. Premier Wever-Croes a institui un comision di experton bou di Arie Swaen cu a reuni cu diferente institutonan halto di estado cu a bin cu proposicionnan pa cambia y regula e diferente regulacionnan rond e diferente institutonan aki di un forma similar. Pa garantisa checks and balances di un pais mester fortifica institutonan halto di estado, ARA, RvA, y Parlamento. Esaki ta e 3 institutonan halto cu e comision ta trahando riba dje.

E comision ta preparando e cambionan di ley. Nan ta trahando riba Ombudsman ya cu esaki tambe ta bay bira un instituto halto di estado.

“Nos kier sincronisa e leynan di Institutonan mas tanto posibel, por ehempel miembronan por sinta un periodo di 7 aña y por prolonga cu maximalmente un biaha mas. Ta den beneficio di pais Aruba pa semper tin sanger y ideanan nobo”, Prome Minister a duna di conoce.

Gabinete Wever-Croes a percura pa tur instituto tin nan miembronan completo pa nan por funciona sin problema, contrario na gobierno anterior cu tawata forsa institutonan di no tuma accion pasobra no tawata nombra nan miembronan.

Investigacion di BO ARUBA haci prome cu eleccion na 2017 a demostra cuanto corupcion tawata tin den e proyectonan di infrastructura di e gobierno anterior. Gobierno anterior a traha pa na un forma artificial no publica e resultadonan di e rapport. Esaki a publica na momento cu Gabinete Wever-Croes a sinta y nombra e miembronan. “Gobierno di Mike Eman a manipula e resultado di eleccion door di no nombra miembronan pa Algemene Rekenkamer pa obstaculisa cu e resultado di e rapport di BO ARUBA wordo publica.”

 “Goberna ta algo serio y como gobernante bo mester percura cu bo institutonan halto di estado por funciona. Mi a pidi Parlamento pa apunta e presidente pa Algemene Rekenkamer cual ta hopi importante. Gobierno a nombra e miembronan di SER segun e experticionan indica pa SER mes, y a empodera Parlamento tambe ya cu awor nan por pidi conseho di SER directamente. Durante gobierno anterior esaki no tawata posibel. Tur investigacion cu Parlamento tawata pidi mester a bay via gobierno. Di e manera aki Aruba por pone su checks and balances funciona. Y ta asina ta fortifica democracia den bo pais”, Prome Minister Evelyn Wever-Croes a duna di conoce.