Prome Minister Evelyn Wever-Croes: Por ta e polonan ta diferente, pero e union mester a busca

Mr. Evelyn Wever-Croes ta e prome hende muhe cu ta ocupando e funcion di Prome Minister na Aruba y durante un discurso na e evento cultural cu a tuma luga diabierna anochi, el a mustra si gratitud y aprecio pa tur esnan cu a sa di sostene durante e hornada electoral aki y cu a mustra cu nan tabata kier e cambio.

El a expresa cu Aruba a haya su Gobierno y a felicita tur esnan presente, pueblo henter, cu un Gobierno nobo. Un Gobierno cu ta consisti di tres diferente partido. Despues di un periodo di formacion, cua tuma su tempo y a test pasenshi di hopi hende, pero a logra. Y a logra pasobra a pone Aruba prome. Pasobra kier pa Aruba sali beneficia y pesey Wever-Croes a cuminsa na gradici esunnan cu a haci tur esaki posibel, durante e evento. Ta papiando di e dos lidernan di partido, cu a duna di nan parti pa a logra e coalicion akinan, kendenan ta Ricardo Croes y Otmar Oduber di RED y POR respectivamente.

E no tabata facil. Pasobra ta bin cada un di polonan diferente y un vision talbes diferente. Pero desde prome momento tabata convenci cu mester enfoca riba loke ta uni nan. E union mester a busca.

Ora cu a realisa cu tin hopi cos ta uni nan, por a sigui cu e proceso. Y principalmente locual ta uni nan, ta pa pone Aruba prome. Pa pone e ser humano central un biaha mas, caminda cu ta bay percura pa Aruba bira un luga sigur atrobe pa biba, cu nos muchanan por lanta den tur trankilidad. Un pais cu tin un cuido di salud digno pa ciudadanonan. Cuido social, asistencia social pa esnan mas vulnerabel den nos comunidad. Enseñansa di calidad, cu por bisa mañan, nos hobennan ta prepara pa carga e pais akinan. Un medio ambiente cu nos ta respeta, pero di berdad.

E ser humano central un biaha mas. Y pa logra esaki tin desafionan y sa esey. Pero e sosten, e cariño, e calor cu a sinti di cada un, a haci cu esey lo bira posibel. Wever-Croes a gradici na un y tur presente pa nan a yega asina leu.

Deseo di Evelyn Wever-Croes ta, cu e union, cu e tres partidonan aki por a mustra, por tin su efecto den comunidad. Pasobra, si wak sr. Ricardo Croes, si wak sr. Otmar Oduber, y sra. Evelyn Wever-Croes mes, nan no ta mesun cos. Nan no a nace na e mesun paisnan. No a lanta cu otro, y manera cu ta bisa, nan no a ni trip cu otro. Pero a bin hunto pasobra kier e miho pa Aruba y e union ey ta e deseo di mas grandi cu e kier mira den nos comunidad bek. No mas polarisacion, no mas antagonismo. Union, pasobra e pais kier logra cosnan grandi. Tempo cu tabata uni y esaki ta e momento cu e union ta bay yuda, pa surpasa tur e desafionan nos dilanti. Union irespecto di unda bo ta bin, di unda bo ta nace, irespecto kico ta e caminda cu a cana. Union den e caminda nos dilanti, guia pa entre otro nos Libertador Betico Croes.

Pa diferente motibo, e dia a yena Wever-Croes cu hopi orguyo y honor y un di nan ta cu e ta sigur cu canando den e pianan cu Betico a laga pa nos, pa e partido en todo caso aden, por logra cosnan grandi pa Aruba un biaha mas.

Un otro motibo di hopi honor y orguyo ta cu pa ser un hende muhe para den su sapatonan na e momentonan aki. Como hende muhe e prioridadnan talbes ta diferente. Meta den bida ta diferente y su meta den bida tabata hopi diferente. Pa Wever-Croes ta importante e micro, e famia, e nucleo. Su casa, su yiunan y awo un nieto. Pero na caminda a realisa cu no por pensa asina so. Cu si berdad, bo kier hasta pa bo mesun yiunan ta feliz y tin oportunidad, bo tin cu haci sacrificio. Y esey ta loke a pone Wever-Croes tuma e paso pa drenta politica. Como hende muhe ta spera cu esaki por inspira tur hende muhe, tur mucha muhe, tur hoben, nunca, pero nunca hinca den bo cabes cu bo no por. Kico cu bo propone bo mes, bo por logra. Si Wever-Croes a logra bira prome minister di pais Aruba, y ainda tin cu custuma cu esey, pero prome minister femenino, tur mucha muhe, tur hoben, tur hende muhe por logra cualkier meta den bida, prome minister Wever-Croes a splica.