Diasabra, Dia di Betico, a tuma luga e acto protocolario cu ponemento di krans. Durante e ceremonia tabata tey presente mandatario, parlamentarionan, como tambe invitadonan for di exterior y e publico en general.
Prome Minister, Evelyn Wever-Croes a indica den su discurso riba e trayectoria di Betico Croes dfm y cu awe, riba su fecha natal, lo a cumpli 82 aña.
Despues di tabata un docente, el a bira un politico y despues a converti su mes den un lider politico mas grandi cu Aruba a conoce den su historia, cargando tambe e titulo di nos libertador.
E mandatario a sigui comenta cu poco pais a conoce un lider asina y cu a logra cosnan grandi pa nan pais. Aruba si a conoce un lider asina y pa esaki ta hopi gradicido.
E mandatario ta sigui ilustra cu Betico tabata tin un vision pa nos pueblo. Pero manera cu nos tur sa, un vision sin accion, ta keda solamente na soño. Betico sinembargo a sa di converti e vision den accion. Cu determinacion, a sa di uni nos pueblo y asina logra cosnan grandi pa Aruba.
Gobierno di Aruba a institui un comision “Ken ta Betico”, cu a produci e aña aki cu a entrega na tur scol basico. Docentenan a ricibi uno y tur alumno di klasnan 4, 5 y 6 tambe. A lansa tambe un website beticocroes.aw cu ta contene e informacion aki.
Y e siguiente paso ta pa inclui esaki den curriculum di e scolnan, cu e meta pa inspira nos hobennan. Pa asina no tin discusion riba e parti importante aki di nos historia nunca mas y e memoria di Betico ta keda eleva riba tur discusion politico, riba tur gobierno.
E memoria di Betico Croes ta patrimonio nacional y nos mester preserv’e. E mandatario ta gradici minister Rudy Lampe pa su colaboracion den e aspecto aki. Un pueblo cu no conoce su historia, ta un pueblo sin futuro, specialmente den e temponan aki cu ta enfocando hopi riba futuro y innovacion di Aruba, e vision pa futuro ta asina importante.
Ta pesey e compromiso di gobierno pa nos historia nunca bay perdi, e mandatario a expresa como parti di su discurso.
E mandatario a sigui comenta di su bishitanan cu el a haci na scol, hunto cu su demas coleganan, y haya un bista kico e muchanan sa y crea rond di e tema di Dia di Betico, cual el a mustra su satisfaccion y alegria cu e empeño haci.
Despues di discurso di e prome mandatario, a sigui un defile di e diferente organisacion y gruponan local manera cu ta custumber durante nos dianan nacional.
Tin cu remarca cu un grupo grandi di persona tabata tey presente, manera tur aña pa asina presencia discurso, declamacion y musica durante e acto protocolar, den e caso aki riba Dia di Betico.
