Pa prome biaha Prome Minister Evelyn Wever-Croes a manifesta su mes tocante e audio di colega di partido MEP y actual Minister Plenipotenciario di Aruba na Hulanda, Ady Thijsen cu a lek e siman aki. Despues di a scucha e grabacion su mes, di papia personalmente cu Thijsen y di scucha e declaracion cu e ultimo aki a duna for di Hulanda diabierna mainta, e prome mandatario Arubano a bisa di no lo reacciona riba algo cu ta ilegal.
“Mi no ta kere cu el (Thijsen) a atacha mi integridad y mi ta duda cu e caso di Arubahuis por wordo uza pa atacha mi integridad,” asina Premir Wever-Croes a bisa durante conferencia di prensa diabierna mainta na Bestuurskantoor como contesta na pregunta di reportero di 24ora.com.
Den mesun declaracion, e mandataro a repasa e liña di tempo den e caso aki, cuminsando na november 2021 te cu awor pa pone enfasis riba e proceso largo cu a tuma pa haci investigacion, pone caso den man di Departamento di Recurso Humano (DRH) y finalmente den man di Ministerio Publico.
Wever-Croes: “Mi ta comprende cu no ta tur hende ta comprende kico a sosoe pasobra Aruba no ta custuma bou di gobierno di AVP di haci e cosnan aki. Tempo di Mike Eman te hasta ta sconde e tipo di cosnan aki.” Adicionalmente a indica cu awor cu el a trece tur cos dilanti den Parlamento y awo husticia mester tuma su curso. Na su opinion, Gabinete Wever-Croes II a hisa e standard cu na Aruba ta papia di integridad. Tambe a comenta tocante forsanan scur cu ta contra di e actitud aki y ta traha cosnan ilegal y falsifica cosnan pa purba crea conmocion; algo cu e ta lamenta. Por ultimo a indica cu e ta continua cu confianza cu practicanan asina lo keda pa pasado y integridad lo vence.
