Diamars mainta te anochi laat Parlamento di Aruba a trata e presupuesto supletorio. Pa prome minister esaki tabata di importancia pasobra a reduci deficit.
Prome Minister mr. Evelyn Wever-Croes a expresa cu a baha e deficit cu tabata prome 227 miyon y awo a bah’e pa 92 miyon. E reduccion aki ta uno hopi grandi y segun e mandatario, esaki tabata loke a yuda pa scapa dje aanwijzing di Hulanda. E ta haya cu esaki ta un momento di celebra cu a mantene autonomia un poco y cu gobierno a logra pone Aruba riba e caminda di finansas sostenibel.
Pa loke ta e reunion mes, esaki tabata riba diferente tema financiero. E mandatario a gradici tur mandatario, pero specialmente Minister di Finansas cu a sa di ta e minister dje cartera aki den e pio crisis aki cu no ta nada agradabel. Nan a logra cu hopi determinacion, cu caracter y curason.
El a reacciona riba e echo cu a mira un biaha mas oposicion cu no tabata t’ey den sala pa shete dia largo. Oposicion a uza algun argumento poco fofo. CAft mes a sali pa bisa oposicion cu nan argumento no ta valido y ta uno incorecto, tambe mester ta den sala di parlamento. Pa shete dia largo nan no a traha pero a cobra si, segun prome minister.
CASO AVESTRUZ
Segun e mandatario, a probecha nan presencia pa asina puntra nan pensamento riba e caso di Avestruz. El a sigui bisa cu pueblo ta tristo pa loke nan ta tende kico a pasa cu e grupito di Benny Sevinger y esunnan cu e officier a menciona cu a bira rico cu e actonan coruptivo. Segun Wever-Croes, pueblo kier pa e representantenan bisa kico nan ta pensa. Coalicion a condena esaki, mientras oposicion, AVP, MAS y Accion21, a keda keto, pero e gobierno ta haya cu nan debe pueblo un contesta.
