A funda Aruba Futura Foundation na aña 2018 pa yuda ehecuta e vision y plan nacional strategico di innovacion. Futura ta ehecuta e proyectonan innovativo bou mando di Ministerio di Asuntonan General. Den cuadro di transpariencia Futura a presenta nan relato anual pa aña 2019, den cual a nota cu a ehecuta 41 proyecto.
Ministerio di Asuntonan General por ehempel a percura pa mehora e plataforma digital di “Bureau Rampenbestrijding” atraves di e proyecto “Raven”, E-kabinet pa “Ministerraad”, infrastructura digital pa Departamento di Impuesto y Ministerio di Infrastructura. Den e relato anual por admira tur e 40+ proyectonan ehecuta.
E-GOVERNEMENT UN PRIORIDAD PA 2020
Pa mehora servicio y calidad di e aparato gubernamental lo inverti mas intenso den e proyecto di E-government. Enfoke di e proyecto aki ta pa haci e aparato gubernamental mas eficiente y baha gasto di e aparato. E proyecto a inicia na 2019 door di busca colaboracion cu “Estonia E-government Academy”. Den cuadro di esaki hunto cu expertonan di Estonia lo percura pa e aña aki ainda brinda diferente servicionan di Gobierno a traves di un plataforma digital y introduci un plataforma digital pa otro departamentonan.
B-LAB ARUBA y E-LEARNING
E proyecto di B-LAB Aruba ta enfoca riba enseñansa tecnico. Ya caba na 2018 y 2019 a percura pa a traves di e proyecto aki muchanan di tur edad por experimenta den un “laboratorium” cu tecnologia di mas moderno manera “robotica” y 3D-printers. Di e forma aki ta stimula nos hobennan pa sigui studia den e ramo tecnico y innovativo, cual lo conoce hopi trabou den futuro cercano.
Prome Minister mr. Evelyn Wever-Croes a anuncia cu e aña aki e proyecto di E-learning ta sigui y Colegio Pastoor Kranwinkel ta e scol cu e aña aki lo conoce innovacion a traves di E-learning y lo ekipa nan cu material innovativo manera borchinan digital (CTOUCH).
PARLAMENTARIO ROCCO TJON: Prioridadnan corecto
“Nos a keda impresiona pa e trabounan desplega door di Futura na 2019 y nos ta wak cu e prioridadnan di Minister Presidente Evelyn Wever-Croes pa 2020 ta bon. Ta scoge pa inverti den nos hobennan y enfoca riba future work vocational training y desaroya e skills necesario pa por ocupa trabounan cu Aruba lo conoce den futuro debi na desaroyo mundial. Ta hopi importante pa for di awo brinda nos hobennan e oportunidad pa den futuro e cuponan di trabou por wordo ocupa pa nos hobennan”, asina Parlamentario Roco Tjon a finalisa bisando.
