Durante e conferencia di prensa diaranson anochi Prome Minister Evelyn Wever Croes a anuncia algun medida nobo cu nan ta bay introduci den fin di siman.
Esaki ta encera cu tur cos ta bay ta cera mientras cu e unico instancianan cu ta bay ta habri ta Botica, Hospital, y pompstation. Tambe negoshinan cu ta haci entrega di cuminda of drive-tru. Por lo demas tur cos ta cera.
Tambe e mandatario a informa u Aruba a haci un peticion na Hulanda pa ayudo den area di salud y a acorda cu lo manda 12 sistema di cama di ICU pa Aruba. Esaki lo aumenta e capacidad pa Aruba di ICU na mas cu 30 cama.
Na mesun momento a anuncia cu no ta permiti pa tin aglomeracion na lama. Solamente pa haci ehercicio, esta landa, subi auto bek y bay cas. No por bay cu stoel ni jug pa sinta pasa un rato ameno.
Minister Wever Croes a bisa cu no ta mira mas medida na e momentonan aki.
Un preocupacion di Gobierno ta cu a mira un aumento di consumo di coriente. Na inicio a constata cu esaki a baha pero awor a mira cu e ta aumentando atrobe. E ta conseha debi na e clima cu ta existi na Aruba, pa ta mas consciente den uzo di coriente, pa habri bentana y laga e biento circula den cas. E ta pidi pa no gasta pa loke coriente.
Tambe a anuncia cu mañan ta riba agenda di Conseho di Minister di Reino un prestamo di mas cu 40 miyon pero sin interes. Pues ta un suma cu ta haya pero cu Aruba lo no bay paga interes pa esaki. Y despues lo bini e otro parti, pero cual no tin informacion ainda con e lo bay ta.
Alto Comisario interino Vanessa Tjon Kock a anuncia cu awe nochi lo cuminsa cu controlnan special riba lama.
